სტატია

აღმოაჩინე ჩვენი ბლოგი



რატომ იმატებთ წონაში - 8 სავარაუდო მიზეზი

ტანსაცმელი, რომელიც ორი თვის წინ გეცვათ, დღეს აღარ გეტევათ, მიუხედავად იმისა, რომ ამ დროის მანძილზე თქვენი ცხოვრების სტილი არ შეცვლილა. ცხადია, წონის სწრაფი მატება ძალიან გაკვირვებთ და  მოულოდნელი ცვლილების მიზეზის დადგენას ცდილობთ. თქვენ ერთადერთი არ ხართ, ვისაც მსგავსი პრობლემა აქვს. ადამიანების საკმაოდ დიდ ნაწილს, რომლებიც ფიტნესით რეგულარულად კავდებიან, ჯანსაღად იკვებებიან და ყოველდღიურად დიდი რაოდენობით წყალსაც სვამენ, წონის მოულოდნელი მატება ხშირად  აწუხებთ.

მიუხედავად იმისა, რომ ჯანსაღი წონის შენარჩუნებაში სწორი კვების რეჟიმის ერთგულება და ფიზიკური დატვირთვა ძალიან გეხმარებათ, არსებობს სხვა მნიშვნელოვანი ფაქტორებიც, რომლებსაც წონის მოულოდნელი მატების გამოწვევა შეუძლია. ჩვენს სტატიაში წონაში სწრაფად მატების სავარაუდო მიზეზებს გაგაცნობთ და მათ წინააღმდეგ ბრძოლის სტრატეგიების შემუშავებაში დაგეხმარებით.

  • ჯანსაღ პროდუქტებს ჭარბი რაოდენობით მიირთმევთ

ჯანსაღი კვების რეჟიმის დაცვა თუ გსურთ, ულუფების მოცულობა მკაცრად უნდა გააკონტოლოთ. ბევრი სასარგებლო პროდუქტი, როგორებიცაა ავოკადო, შვრია, შავი შოკოლადი ან ნიგოზი, მაღალი კალორიულობით გამოირჩევა. მათი დიდი რაოდენობით მიღება წონაში მატებას გამოიწვევს. არ აქვს მნიშვნელობა რა სახის პროდუქტს მიირთმევთ, სიფრთხილე ნებისმიერ შემთხვევაში უნდა გამოიჩინოთ. მხოლოდ ხილითა და ბოსტნეულით მომზადებული კერძიც კი ზომიერად უნდა მიირთვათ. თუ არაქისის კარაქს მიირთმევთ, მისი მოცულობა პინგ-პონგის ბურთის მოცულობას არ უნდა აღემატებოდეს, ხოლო ბრინჯისა და მაკარონის ერთი ულუფა თქვენი მუშტის ზომის უნდა იყოს. ულუფების მოცულობას თუ გააკონტროლებთ, წონაში მოულოდნელი მატებისგან თავის დაცვას უკეთ შეძლებთ.

  • თქვენ ანტიდეპრესანტებით მკურნალობთ

ანტიდეპრესანტებით მკურნალობისას ადამიანების დაახლოებით 25 % წონაში მატებას უჩივის. ზოგიერთი ანტიდეპრესანტი მადას მნიშვნელოვნად აძლიერებს. განსაკუთრებული მოთხოვნილება კი ნახშირწყლებზე გიჩნდებათ. დამამშვიდებელი აბების მიღება მეტაბოლიზმზეც უარყოფითად აისახება. დეპრესიულ ადამიანებს საკვებზე მოთხოვნილება ნაკლებად აქვთ. ანტიდეპრესანტების ეფექტური მოქმედების შემთხვევაში, მათი მადა ორმაგდება, რაც წონის მატებას იწვევს. თუ ამჩნევთ, რომ მედიკამენტები, რომლებსაც იღებთ, საკვებისადმი თქვენს მოთხოვნილებას მნიშვნელოვნად ზრდის, ეცადეთ, სხვა სახის ანტიდეპრესანტებით იმკურნალოთ. ზოგიერთი ანტიდეპრესანტი წონაში მატებას არ იწვევს. ანტიდეპრესანტები დამოუკიდებლად არ შეცვალოთ. შესაძლოა, თქვენ მიერ შერჩეული აბები დეპრესიის მკურნალობისას მაღალი ეფექტურობით არ გამოირჩეოდეს, რაც დამატებით პრობლემებს შეგიქმნით. თუ მკურნალობის ალტერნატიული მეთოდების მოძიებას გადაწყვეტთ, აუცილებლად გაიარეთ კონსულტაცია მკურნალ ექიმთან.

  • ძალიან იშვიათად იწონებით

ადამიანებს, რომლებიც სხეულის ფორმების მოულოდნელი ცვლილებით აღფრთოვანებულები არ არიან, სასწორის დანახვა აშინებთ. ისინი წონის გადაკონტროლებას ერიდებიან და წარმოდგენა არ აქვთ, რამდენი კილოგრამით მეტს იწონიან, რაც ძალიან დიდი შეცდომაა. ზამთრის ცივ დღეებში, როდესაც სხეულის ტანსაცმლით დაფარვას მარტივად ახერხებთ, წონაში მატების ნაკლებად გეშინიათ, რის გამოც ჯანსაღი კვების რეჟიმს ხშირად ღალატობთ. თუ იშვიათად იწონებით, შესაძლოა, წონაში შეუმჩნევლად მოიმატოთ. თუ ფორმის შენარჩუნება გსურთ, კვირაში ერთხელ მაინც შეამოწმეთ, რამდენს იწონით. თუ სასწორს უფრო ხშირად გამოიყენებთ, წონის გადაკონტროლებას უკეთ შეძლებთ. შეგიძლიათ თქვენი წონა ორშაბათს, ოთხშაბათს და პარასკევს შეამოწმოთ.

  • ზედმეტად ბევრს ვარჯიშობთ

თუ დარბაზში რეგულარულად დადიხართ, მაგრამ წონაში მაინც იმატებთ, ე.ი. ვარჯიშს მეტისმეტად ბევრ დროს უთმობთ. მართალია, ფიზიკური დატვირთვა წონაში კლებისთვის ძალიან სასარგებლოა, მაგრამ თუ კვირაში რამდენჯერმე ხანგრძლივად და ინტენსიურად დაიტვირთებით, ვარჯიში ეფექტურობას დაკარგავს. კვლევებით დგინდება, რომ ადამიანები ვარჯიშზე ხშირად მეტისმეტად დიდ იმედებს ამყარებენ. ისინი თვლიან, რომ ინტენსიური ფიზიკური დატვირთვა მათ თავისუფლად კვების საშუალებას აძლევს, რაც დიდი შეცდომაა. მართალია, ვარჯიშის დროს კალორიებს წვავთ, მაგრამ თუ რაციონალურად არ იკვებებით, ხანგრძლივი და დამღლელი დატვირთვა ვერ დაგეხმარებათ. რაც უფრო მეტს ვარჯიშობთ, თქვენი თავდაჯერება მეტად იზრდება, რის გამოც ჯანსაღი კვებითი ჩვევების უარყოფაზე გადადიხართ, რაც წონის მატებას იწვევს. აღნიშნული პრობლემის წინაშე რომ არ დადგეთ, ზედმეტად ნუ დაიტვირთებით. ვარჯიშის წინ საკვები აუცილებლად მიირთვით. დატვირთვის დასრულების შემდეგ საკუთარი მადა ნებისმიერ შემთხვევაში უნდა გააკონტროლოთ.

  • თქვენი ასაკი წონის შენარჩუნებაში ხელს გიშლით

30 წელს გადაცილებული ადამიანები კუნთოვან მასას სწრაფად კარგავენ. კუნთოვანი მასის დანაკარგი მეტაბოლიზმის შენელების მიზეზი ხდება. მეტაბოლიზმის გაუარესების პირობებში ორგანიზმში ცხიმები სწრაფად გროვდება. შესაძლოა, თქვენ ისევე იკვებებით, როგორც რამდენიმე წლის წინ, მაგრამ წონის შენარჩუნებას ვეღარ ახერხებთ. ასაკის მატებასთან ერთად ფორმაში ჩადგომა უფრო და უფრო რთულდება. მეტაბოლიზმის გასაუმჯობესებლად ფიზიკური დატვირთვა აუცილებელია. კარდიოსა და წონებით ვარჯიშის კომბინირება კუნთოვანი მასის ჩამოყალიბებაში შეგიწყობთ ხელს, რაც კალორიების დაწვას გაგიადვილებთ.

  • ღამით ცუდად გძინავთ

თუ ღამის განმავლობაში საკმარისად არ გძინავთ, ვარჯიშისა და ჯანსაღი კვების რეჟიმის კომბინაცია  წონის შენარჩუნებაში ვერ დაგეხმარებათ. კვლევებით დგინდება, რომ უძილობა მასის ინდექსისა და წელის გარშემოწერილობის ზრდის ერთ-ერთი მთვარი მიზეზია. ძილის ნაკლებობა შიმშილის ჰორმონის, გრელინის დონის მატებას იწვევს, რის გამოც თქვენ კალორიებს ჭარბი რაოდენობით იღებთ. ადამიანები, რომლებსაც უძილობა აწუხებთ, თავიანთი მადის გაკონტროლებას ნაკლებად ახერხებენ, რის გამოც დიდი ულუფებით იკვებებიან. თუ ორი კვირის განმავლობაში ყოველდღიურად 8 საათს ძილს დაუთმობთ, შეამჩნევთ, რომ თქვენი მადა მნიშვნელოვნად დაქვეითდება, რაც ზედმეტი კალორიების მიღებისგან თავის შეკავებაში დაგეხმარებათ.

  • თქვენ სტრესულ  გარემოში მუშაობთ

მართალია, საკუთარი პრობლემების სხვებისთვის გადაბრალება გამართლებული საქციელი არ არის, მაგრამ ზოგჯერ უსიამოვნო ბრალდებების თავიდან არიდება შეუძლებელია. თუ თქვენ სტრესულ გარემოში მუშაობთ და მეტისმეტად მომთხოვნი უფროსი გყავთ, შესაძლოა, წონაში სწორედ ამ მიზეზით იმატებდეთ. სტრესი ჰორმონ კორტიზოლის გამომუშავებას უწყობს ხელს. ეს უკანასკნელი კი მუცლის არეში ზედმეტი ცხიმების დაგროვების ერთ-ერთ მთავარ გამომწვევ მიზეზად გვევლინება. კორტიზოლი სისხლში გლუკოზის დონის მატებასაც უწყობს ხელს, ამასთან მისი გავლენით ინსულინის მოქმედება ითრგუნება, რის გამოც თქვენ გამუდმებით გშიათ და საკუთარი მადის გაკონტროლებას ვეღარ ახერხებთ. სტრესისგან გასათავისუფლებლად თქვენს მენეჯერს აუცილებლად გაესაუბრეთ. თუ სხვებთან ერთად მუშაობისას დროის რაციონალურად გადანაწილებას ვერ ახერხებთ, სამსახურში 15 წუთით ადრე მიდით, რათა დღის გეგმა წინასწარ განსაზღვროთ, შემდეგ კი მშვიდად და აუღელვებლად იმუშაოთ.

  • მხოლოდ ვარჯიშის იმედად ხართ და კვებას სათანადო ყურადღებას არ უთმობთ

დარბაზში სიარული ძალიან ბევრ სარგებელს გპირდებათ. თუ კუნთოვანი მასის ზრდა ან გულ-სისხლძარღვთა სისტემის გაჯანსაღება გსურთ, ვარჯიში უნდა დაიწყოთ. მიუხედავად იმისა, რომ ვარჯიში თქვენი ორგანიზმისთვის წარმოუდგენლად სასარგებლოა, არ უნდა იფიქროთ, რომ ნებისმიერ პრობლემას მისი დახმარებით გადაჭრით. თუ ყოველდღიურად გემრიელ ნაყინს, ნამცხვრებსა და ტკბილ სასმელებს მიირთმევთ, ვარჯიში წონის შენარჩუნებაში ნამდვილად ვერ დაგეხმარებათ. დიდი მნიშვნელობა ენიჭება დატვირთვის ტიპსაც. ვარჯიშის ზოგიერთი ნაირსახეობა წონაში კლებისთვის ნაკლებად ეფექტურია. თუ ისეთი ტიპის დატვირთვას ანიჭებთ უპირატესობას, რომელიც მაღალი ინტენსივობით არ გამოირჩევა, მაგრამ თქვენს მადას მნიშვნელოვნად აძლიერებს, ზედმეტი კილოგრამებისგან ვერ გათავისუფლდებით. ფორმის შენარჩუნება თუ გსურთ, კვებას სათანადო ყურადღება მიაქციეთ. სავარჯიშო პროგრამა სიფრთხილით უნდა შეადგინოთ. უპირატესობა ისეთ ვარჯიშებს მიანიჭეთ, რომელთა დახმარებით წონაში მარტივად დაიკლებთ. უამრავი კვლევით დასტურდება, რომ მაღალი ინტენსივობის ინტერვალური ვარჯიში, რომელიც გულ-სისხლძართვა სისტემას აჯანსაღებს და კუნთოვანი მასის დანაკარგის გარეშე ზედმეტი კილოგრამებისგან გათავისუფლებაშიც გეხმარებათ, მადის გაძლიერებას არ იწვევს. ჯანსაღი კვების რეჟიმის ერთგულების გარეშე ფორმის შენარჩუნება გაგიჭირდებათ.

წარმატებებს გისურვებთ!

გაიარეთ ავტორიზაცია და შეაფასეთ სტატია


ცუდი

1 2 3 4 5 6 7 8 9 10

კარგი

0

დან 0

0 ხმა

დღეში დამწვარი კალორიების გამოთვლა


სანტიმეტრებში
კილოგრამებში
განმარტება:
მჯდომარე, ნაკლებმოძრავი :
დღის განმავლობაში ძალიან მცირე აქტივობა
მსუბუქად აქტიური:
მსუბუქი ფიზიკური აქტივობა კვირაში 1-დან 3 დღემდე.
ზომიერად აქტიური :
საშუალო ფიზიკური აქტივობა კვირაში 3-დან 5 დღემდე.
ძალიან აქტიური :
მძიმე ფიზიკური აქტივობა კვირაში 6-დან 7 დღემდე.
უკიდურესად აქტიური :
ყოველდღიური მძიმე ფიზიკური ატივობა
შენი წარმატების პორტალი

კონტაქტი / უსაფრთხოების პოლიტიკა