იოგა ბარძაყებისა და დუნდულებისთვის
თანამედროვე მჯდომარე ცხოვრების წესისა და ფიზიკური აქტივობის ნაკლებობის გამო ბარძაყებისა და დუნდულების არეში ზედმეტი ცხიმების დაგროვება არცთუ იშვიათი შემთხვევაა. თუ აღნიშნული პრობლემა თქვენც გაწუხებთ, ზედმეტად ნუ აღელდებით, მის მოგვარებაში იოგა დაგეხმარებათ. არსებობს რამდენიმე საბაზისო ასანა, რომლებიც კონკრეტულად ბარძაყისა და დუნდულების არის დათხელებისთვის გამოიყენება. სათანადო დიეტისა და იოგას კომბინაცია აღნიშნულ არეებში ცხიმის წვას მნიშვნელოვნად გაგიმარტივებთ.
სკამის პოზა
მოცემული ასანა ფეხის კუნთების სტიმულაციისთვის გამოიყენება. ის განსაკუთრებით სასარგებლოა ბარძაყებისა და დუნდულების არისთვის. სკამზე ჯდომა საკმაოდ მარტივია, თუმცა წარმოსახვით სკამზე დაბრძანება საკმაოდ გაგიჭირდებათ. ამ დროს კუნთები ძალიან იტვირთება და იძაბება, რადგან მთელი დატვირთვა ფეხის კუნთებზე მოდის. თქვენი სხეული მთლიანად ემყარება თქვენს ფეხებს, განსაკუთრებით კი ბარძაყებისა და დუნდულების კუნთებს. მას არამხოლოდ ტონუსში მოჰყავს მოცემული კუნთები, არამედ მათ აძლიერებს და კუნთოვან მასასაც ზრდის.
აღნიშნული ასანას შესრულებისას სწორად დადექით. მუხლები ნაზად მოხარეთ და დუნდულები ნელა დაუშვით ქვემოთ. წარმოიდგინეთ, რომ წარმოსახვით სკამზე ჯდებით. ჩაისუნთქეთ და ხელები თავს ზემოთ აღმართეთ. მოცემულ პოზაში ცოტა ხნით უნდა გაჩერდეთ და სუნთქვა განაგრძოთ. შემდეგ კი მოეშვით და თავისუფლად დადექით. თქვენს სხეულს ყურადღებით უსმინეთ. თუ დამწყები ხართ, ბარძაყები ფრთხილად დაუშვით. კუნთების ზედმეტ დაძაბვას მოერიდეთ. ვარჯიშში დახელოვნებასთან ერთად ინტენსივობაც გაზარდეთ.
მებრძოლის პოზა
აღნიშნული ასანაც ფეხის კუნთებზეა გათვლილი, განსაკუთრებით დიდი სარგებელი მას ბარძაყის შიდა მხარის კუნთებისთვის მოაქვს. ერთი შეხედვით, მოცემული ვარჯიში მარტივად მოგეჩვენებათ, მაგრამ ის ფეხის იმ კუნთებზე მუშაობს, რომლებიც დღის განმავლობაში ყველაზე ნაკლებად იტვირთებიან. ამასთან ის ფეხის ყველა კუნთს ავარჯიშებს და თითოეულ მათგანს გარკვეულწილად ტვირთავს.
მოცემული ასანას შესრულების დროს ფეხები ერთმანეთს უნდა დააშოროთ. მარცხენა ქუსლი გვერდით წაიღეთ და მარცხენა ფეხის წვერი გარეთ მიმართეთ. მარჯვენა ქუსლს უფრო მეტად დაეყრდენით. ბარძაყებით ქვემოთ დაეშვით და ხელები მხრების გასწვრივ გაშალეთ. წარმოიდგინეთ, რომ თქვენი სხეულიდან უარყოფით ენერგიას დევნით. მზერა წინ მიმართეთ და პოზა მყარად შეინარჩუნეთ. მშვიდად და ძლიერად ისუნთქეთ. შემდეგ კი მოეშვით და იგივე მოძრაობა მეორე მხარესაც გაიმეორეთ. უფრო მეტი ეფექტისთვის, ფეხები მაქსიმალურად განივად გაწელეთ. მენჯი კი მაქსიმალურად დაბლა დაუშვით. დარწმუნდით, რომ ბალანსსა და მოძრაობის მთლიანობას აბსოლუტურად ინარჩუნებთ.
მოცეკვავის პოზა
აღნიშნულ პოზაში ბარძაყის ფლექსორები იტვირთება და საკმაოდ დიდ სტიმულაციას განიცდის. ბარძაყის შიდა და გარე კუნთები, ასევე დუნდულის კუნთები მაქსიმალურად იტვირთება. მოცემული ასანა ფეხს განსაკუთრებით აძლიერებს, რადგან მთელი სხეული ერთ ფეხს ებჯინება. მენჯიდან თითის წვერამდე თქვენი ფეხის ყველა კუნთი ტონუსშია და დატვირთვას განიცდის. დუნდულა კუნთები თავისუფლდება და სხეული ენერგიით იტვირთება. ფეხის არეში სისხლის მიმოქცევა უმჯობესდება და ჟანგბადისა და მკვებავი ნივთიერებების გადაადგილების პროცესი მარტივდება.
მარჯვენა ფეხი მაღლა აზიდეთ და უკან წაიღეთ, გაშალეთ ისე, რომ ფეხი იატაკის პარალელურად გეჭიროთ. ფეხი მუხლში მოხარეთ და მარჯვენა ხელი ფეხის წვერამდე მიიტანეთ. მარცხენა ხელი წინ წაიღეთ და გაშალეთ. ხელისგულები გარეთ უნდა მიმართოთ. მარცხენა თითებს დააკვირდით. პოზა რამდენიმე წამს შეინარჩუნეთ და პარალელურად ღრმად ჩაისუნთქეთ. მოეშვით და მოძრაობა მეორე ფეხისთვისაც გაიმეორეთ.
აქლემის პოზა
მოცემული ასანა არაჩვეულებრივად ხსნის გულ-მკერდის კუნთებსა და ბარძაყის ფლექსორებს. მას წარმატებით მოჰყავს ტონუსში კიდურები და დუნდულები. აღნიშნული ვარჯიში სხეულის წინა ნაწილს ტვირთავს, შესაბამისად ის არაჩვეულებრივია ბარძაყის წინა კუნთების ტონუსში მოსაყვანად.
დაჯექით შესაბამის პოზაში. თქვენი ზურგის კუნთები ფეხის კუნთების პარალელურ მდგომარეობაში უნდა აღმოჩნდეს. ეცადეთ მაქსიმალურად უკან გადაიხაროთ. ხელისგულებით ფეხებს უნდა მიწვდეთ. მხრები კარგად გაშალეთ. თავი უკან გადახარეთ და უკანა მიმართულებით იყურეთ. პოზა შეინარჩუნეთ და ღრმად და ძლიერად ისუნთქეთ. მოეშვით და გათავისუფლდით.
ფეხების გაშლა ჯდომში
მოცემული ასანა თქვენი ფეხის ზედა კუნთებზე ძალიან დადებითად მოქმედებს. გარდა იმისა, რომ მისი შესრულების დროს კუნთები ძალიან კარგად იწელება, ბარძაყის შიდა კუნთები განსაკუთრებულ დატვირთვას განიცდის. ის აძლიერებს ფეხებს და მათ მოქნილობასაც მატებს.
ასანას პოზაში ჩაჯექით. ფეხები მაქსიმალურად გაშალეთ. ხელისგულები წინ დაიწყვეთ და გულ-მკერდის გასწვრივ ცენტრში ერთმანეთს მიაბჯინეთ. თუ მოქნილობა ხელს გიწყობთ, ეცადეთ მაქსიმალურად წინ გადმოიხაროთ და თავით იატაკს შეეხოთ. თუ მსგავს მოქნილობას ვერ ავლენთ, ხელები იდაყვებში მოხარეთ და თავი ჰაერში გეჭიროთ. რამდენჯერმე ჩაისუნთქეთ. შემდეგ სხეულის ზედა ნაწილი კვლავ მაღლა აზიდეთ. ფეხები კი ერთმანეთს მიაბჯინეთ.
თავის გადახრა ფეხის მიმართულებით
მოცემული ასანა მოქნილობის გაუმჯობესებას ემსახურება. ის დადებითად მოქმედებს სახსრებზე, ასევე ბარძაყებისა და დუნდულების კუნთებზე. კუნთები კარგად იწელება, სისხლის მიმოქცევა კი მნიშვნელოვნად უმჯობესდება. კუნთები უკეთ იკვებება და მათი მიმდებარე არე ჯანსაღდება. მოცემული ასანა ძალიან აძლიერებს ფეხებს.
მარცხენა ფეხი მუხლში მოხარეთ. ისეთ პოზაში დაჯექით, რომ მარცხენა ფეხის წვერით მარჯვენა ფეხის ბარძაყის შიდა მხარეს ეხებოდეთ. ხელები გაშალეთ და გაასწორეთ. ტორსით წინ გადაიხარეთ. ხელები ფეხის წვერებისკენ უნდა წაიღოთ. ეცადეთ მუცლით ჩაისუნთქოთ. სუნთქვა შეიკავეთ, შემდეგ კი მოეშვით და მოდუნდით. მოძრაობა მეორე ფეხით გაიმეორეთ. მართალია, მოცემული ასანას შესრულებისას თქვენი თავით თქვენს ფეხს უნდა შეეხოთ, მაგრამ თუ ამას ვერ ახერხებთ, ნუ აღელდებით. მთავარია ვარჯიშის დროს ზურგი სწორად გეჭიროთ.
ანგელოზის პოზა
მოცემული ასანა ძალიან დადებითად მოქმედებს დუნდულების კუნთებზე. თქვენი ბარძაყის შიდა კუნთები კი კარგად იწელება და ტონუსში მოდის. აღნიშნული ასანა მთლიანად ბარძაყისა და დუნდულების კუნთებზეა ორიენტირებული და მას ნამდვილი სასწაულების მოხდენის უნარიც შესწევს.
ხალიჩაზე დაჯექით. ფეხები კარგად გაშალეთ. ფეხები მუხლებში უნდა მოხაროთ. ფეხისგულები ცენტრის მიმართულებით წაიღეთ, ისინი ერთმანეთს უნდა მიაბჯინოთ. ზურგში კარგად გაიშალეთ და ასანას შესრულების დროს ის ბოლომდე სწორად გეჭიროთ. ხელები ძირს დაუშვით და ცენტრისკენ წაიღეთ. ხელისგულებით ფეხის ტერფებს უნდა შეეხოთ. ფეხები ნელ-ნელა დაბლა დაუშვით და საბოლოოდ იატაკს დააბჯინეთ. ეცადეთ ფეხები იატაკს მაქსიმალურად მიუახლოვოთ. მოცემული პოზა რამდენიმე წამის განმავლობაში უნდა შეინარჩუნოთ. შემდეგ კი მოეშვით და გათავისუფლდით.
დუნდულებისა და ბარძაყის კუნთებისთვის იოგა კიდევ არაერთ მოძრაობას გთავაზობთ. ფეხის კუნთების გაწელვა და ტონუსში მოყვანა ძალიან მნიშვნელოვანია. სავარაუდოდ, თქვენ ყველაზე დიდ პრობლემად ბარძაყების არეში ცხიმის დაგროვებას და ვიზუალის დამახინჯებას მიიჩნევთ, თუმცა ზედმეტ ცხიმებს გაცილებით სერიოზული პრობლემების შექმნა შეუძლია. ამიტომ ნუ დაიზარებთ. დახმარებისთვის იოგას მიმართეთ. დარწმუნებული უნდა იყოთ, რომ ვარჯიშის დროს დიდ სიამოვნებასაც მიიღებთ და სასურველი შედეგიც არ დააყოვნებს.
