ფიტნესი ვარიკოზის წინააღმდეგ
ქალბატონები, რომლებიც აღმოაჩენენ, რომ მათ ვარიკოზი აწუხებთ, ფიქრობენ, რომ ფიტნესით ვეღარასდროს დაკავდებიან. ისინი ვერ ხვდებიან, რომ შეცდომას უშვებენ, რადგან ფიტნესი ამ შემთხვევაში მათს ჯანმრთელობას საფრთხეს აბსოლუტურად არ უქმნის, პირიქით, მას უდიდესი სარგებლის მოტანა შეუძლია. თუ ვარიკოზის პრობლემის მქონე ქალბატონები რაციონალურად და სწორად ივარჯიშებენ, მათ 100 %-იანი შედეგი ექნებათ.
ფიტნესი რეცეპტით
თუ თქვენ ფიზიკურ დატვირთვას მიჩვეული ხართ და ვარიკოზი აღმოგაჩნდათ, სპორტული აქტივობებისგან თავის შეკავება არ მოგიწევთ. ვარჯიში ექიმის მკაცრი მეთვალყურეობით და ფიტნეს-ტრენერის დახმარებით უნდა განაგრძოთ. თქვენ სპეციალური საცვლების ტარებაც მოგიწევთ, რომლებიც მძიმე დატვირთვისას ვენების კედლებს დაიცავენ.
ვარიკოზი 3 სტადიად იყოფა, თითოეული მათგანი განსხვავებული სიმძიმისაა და შესაფერის ფიზიკურ დატვირთვას მოითხოვს.
პირველი სტადია - კოსმეტიკური დეფექტები
პირველ სტადიაზე ვარიკოზი სერიოზულ სიმპტომებს არ ავლენს, გვხვდება მხოლოდ მცირედი კოსმეტიკური დეფექტები, რომლებიც ვიზუალურად შესამჩნევია.
ამ შემთხვევაში შეგიძლიათ ტრენაჟორებზე ივარჯიშოთ და ვენები მეტ-ნაკლებად დატვირთოთ. აუცილებელია ვარჯიშამდე კარგად გახურდეთ და ფეხები შეამზადოთ. ასე კუნთებსაც გააძლიერებთ და თავიდან აიცილებთ ისეთ არასასიამოვნო გართულებებს, როგორიცაა თრომბოფლებიტი.
არ შეიძლება სარბენ ბილიკზე აერობული ვარჯიშებით მეტისმეტად გადატვირთვა.
მეორე სტადია - სიმძიმე ფეხებში
გარდა იმისა, რომ ვენები მნიშვნელოვნად იკვეთება, ფეხებში გამუდმებული სიმძიმის შეგრძნება ჩნდება. ღამის საათებში სიმპტომები განსაკუთრებით მწვავდება.
ამ დროს შესაძლებელია წყლის აერობიკითა და ცურვით დაკავდეთ. იოგასა და პილატესსაც ნუ დაივიწყებთ. ვარჯიშთა უმეტესობა მწოლიარე მდგომარეობაში სრულდება, ზოგიერთი მათგანი კი - მაღლა აწეული ფეხებითაც, რაც ვარიკოზის დროს სასარგებლოა. წყლის აერობიკისა და ცურვის დროს ფეხებზე მძიმე დატვირთვა არ მოდის. რაც შეეხება იოგას, ამ დროს ვარჯიში ძალიან ნელა სრულდება, ტვირთავს შიდა კუნთებს და საკუთარ ორგანიზმზე დაკვირვების საშუალებას იძლევა.
მეორე სტადიაზე არ უნდა დაკავდეთ ველოტრენაჟორით, სარბენი ბილიკით, ძალოვანი აერობიკით, არ დატვირთოთ ფეხი ზედმეტად, ნუ ირბენთ და რაც მთავარია, ნუ გააკეთებთ ნახტომებს!
მესამე სტადია - შეშუპება
მესამე სტადია საერთო სურათს კიდევ უფრო ამძიმებს. ფეხზე ხანგრძლივად დგომისას ფეხები შუპდება, ჩნდება წყლულოვანი ფორმის ლაქები, სისხლოვანი კვანძები.
ამ დროს შესაძლებელია ცურვა, თუმცა სასურველია, რომ ეს თბილ წყალში გააკეთოთ. ფეხების ყოველგვარი ზედმეტი დატვირთვა გამორიცხეთ. მეტი იარეთ, თუმცა კარგად დააკვირდით თქვენს თვითშეგრძნებებს. ნუ გადაიღლებით. თბილ წყალში თქვენს ვენებს არაფერი ემუქრება. მას ერთგვარი კომპრესის ფუნქციის დაკისრება შეუძლია. ამ დროს გრავიტაცია მცირდება, კუნთები კი იტვირთება, რაც სამკურნალო ეფექტს ზრდის.
თქვენი მდგომარეობის შეფასება ამ ეტაპზე ექიმ-ანგიოლოგს შეუძლია. აუცილებელია დადგინდეს დაავადების გამომწვევი მიზეზები.
ვარჯიშები ვარიკოზით დაავადებულთათვის
არსებობს სპეციალურ ვარჯიშთა კომპლექსი, რომელიც ვენების ვარიკოზს ებრძვის და მისი შესრულება სახლშიც შეგიძლიათ.
- მაკრატელი
დაწექით ხალიჩაზე. ხელები ძირს დააწყვეთ. ფეხები მაღლა აზიდეთ და ერთმანეთზე გადააჯვარედინეთ, თანაბრად ისუნთქეთ. ვარჯიში მანამ უნდა აკეთოთ, სანამ დაღლას არ იგრძნობთ.
- ველოსიპედი
დაწექით იატაკზე და ფეხები იატაკის პარალელურად აზიდეთ. წარმოიდგინეთ, რომ ველოსიპედს მართავთ, ფეხები გამუდმებით ამოძრავეთ. არ გადაიღალოთ. მთავარია ზურგი იატაკს არ მოშორდეს.
- ზურგზე წოლა
ფეხები ხალიჩაზე უნდა გეწყოთ. ისინი იატაკთან 15-20 გრადუსიან კუთხეს უნდა ქმნიდნენ. მარჯვენა ფეხი უნდა მოხაროთ და მუხლი მკერდთან მიიტანოთ. ორივე ხელით ტერფს მოეჭიდეთ. ნელ-ნელა ფეხი მაღლა აზიდეთ და ვერტიკალურად გაასწორეთ. ხელები ამ დროს ნელ-ნელა მუხლამდე უნდა ჩამოაცუროთ. ფეხი კვლავ დაუშვით და იგივე მეორე ფეხითაც გაიმეორეთ.
