ბილ გეიგერის რჩევები ახალბედა ბოდიბილდერებს
ბილ გეიგერი, ბოდიბილდერი, მარკეტინგისა და სპორტული ჟურნალისტიკის მაგისტრი და Bodybuilding.com - ის მთავარი რედაქტორი კვლავინდებურად ცდილობს კარგი ფორმის შენარჩუნებას და გამოუცდელი ათლეტებისთვისაც არ ენანება სასარგებლო რჩევების მიცემა. მისი თქმით, 55 წლიანმა გამოცდილებამ ძალიან ბევრი რამ ასწავლა. ტრავმებმა და უსიამოვნებებმაც დიდი სარგებელი მოუტანა. მაშ ასე, გთავაზობთ გამოცდილი ბოდიბილდერის რჩევებს, რომლებიც სამომავლო პერსპექტივებსა და გამოწვევებზე გარკვეულ წარმოდგენებს შეგიქმნით.
- ზოგჯერ გენეტიკა დაუმარცხებელია
მახსოვს ჯერ კიდევ სკოლაში ვსწავლობდი. ჩემს ერთ-ერთ თანაკლასელს წარმოუდგენლად ძლიერი ბიცეფსი ჰქონდა. დღემდე მახსოვს, თუ როგორი შთაბეჭდილება მოახდინა ჩემზე მისმა შთამბეჭდავმა აღნაგობამ. მე 34 წლის მანძილზე ვვარჯიშობდი და მინდა გითხრათ, რომ დღესაც კი ვერ მაქვს ისეთი ბიცეფსი, როგორიც ჩემს თანატოლს 14 წლის ასაკში ჰქონდა.
არსებობს გენეტიკური მაჩვენებლები, რომელთა შეცვლა ვერ ხერხდება, რაოდენ ძალიანაც უნდა გინდოდეთ ეს. არ აქვს მნიშვნელობა, რა ინტენსივობით ვარჯიშობთ. სხვებს არ უნდა გაეჯიბროთ. ყველას თავისი ინდივიდუალური აღნაგობა აქვს და ყურადღება უნდა გაამახვილოთ თქვენს ძლიერ მხარეებზე და იზრუნოთ მათ განვითარებაზე. ეს საუკეთესო გადაწყვეტილება იქნება.
- ვარჯიშის გამოტოვება სირთულეებს შეგიქმნით
ახალგაზრდობაში ძალიან მიზანდასახული ვიყავი. ვარჯიშს არასდროს ვაცდენდი. ახლა ყველაფერი სხვაგვარადაა. შემიძლია თავს მოდუნების უფლება მივცე. თუ დარბაზში წასვლა არ მინდა, თავს არ ვაიძულებ, ეს გავაკეთო. თუმცა ყოველდღიურად ვაკეთებ გარკვეული ტიპის ვარჯიშებს, მაგ. კარდიოს.
ვარჯიშის გამოტოვებასთან დაკავშირებული მთავარი პრობლემა ის არის, რომ ერთ გაცდენას მეორე მოჰყვება, მეორეს კი მესამე და ეს ძალიან სწრაფად ხდება. ყოველთვის, როდესაც ძალისხმევას მოვადუნებდი, ფორმაში ჩადგომა ძალიან მიძნელდებოდა. უმჯობესია, სიზარმაცეს სათანადოდ შეებრძოლოთ.
- შედეგს ერთ საათში ვერ დაინახავთ
ვარჯიშის არითმეტიკა სასტიკია. მთელი წლების მანძილზე ხელის კუნთებს მხოლოდ 10 სანტიმეტრი შევძინე. ჩემი მაქსიმუმისთვის რომ მიმეღწია ამისთვის 10 წელი დამჭირდა. რომ დავწვრილმანდე და საშუალო მაჩვენებელი გამოვითვალო, გამოვა, რომ თითოეულ ვარჯიშზე ბიცეფსს მხოლოდ 0,01 სანტიმეტრით ვზრდიდი.
თქვენი ენთუზიაზმი მოთმინებით უნდა გაამყაროთ, რადგან შეუძლებელია შედეგი ერთ დღეში დაინახოთ. მთელი იმ დროის მანძილზე, რაც ვარჯიშით ვარ დაკავებული სულ 27 კილოგრამი მოვიმატე, რაც წლიურად 2,7 კილოგრამს უდრის.
- ყველაფერი გაცილებით რთულად გეჩვენებათ
ახლა, როდესაც ჩემს განვლილ გზას ვაკვირდები ყველაფერი წარმოუდგენლად რთულად მეჩვენება. ვარჯიშის ინტენსივობა მნიშვნელოვნად შევამცირე, რადგან ტესტოსტერონის დონემ და ფიზიკურმა მონაცემებმა ასაკთან ერთად ბუნებრივად განიცადა რეგრესი. სახსრების ტკივილიც დამჩემდა. ამას, ცხადია, ვებრძოდი, მაგრამ ახლა ისე ვღებულობ, როგორც ბუნებრივ პროცესს, რომელსაც შევეგუე.
ინტენსიური ვარჯიში ორგანიზმს არ აზიანებს. არ აქვს მნიშვნელობა, რას ფიქრობენ სხვები. თქვენ ამან არ უნდა შეგაშინოთ. ყვეალაფერი გაცილებით რთულად ჩანს, ვიდრე სინამდვილეშია.
- ასაკთან ერთად წონის დაკლება გაგიჭირდებათ
ახალგაზრდობაში გასართობი საღამოების მოწყობისგან თავს არასდროს ვიკავებდი, რადგან 2-3 კილოს ძალიან სწრაფად ვიკლებდი და ისინი ზიანს ვერ მაყენებდნენ. ახლა კი ყველაფერი სხვაგვარადაა. მსგავს საღამოებს ნაკლებად ვეტანები, რადგან მათი უარყოფითი გავლენები ძალიან დიდ წინაღობად მექცა. წონაში კლებაც წინა წლებთან შედარებით, ცხადია, გაცილებით მიძნელდება.
ამჟამად 9 კილოგრამის დაკლებას ვგეგმავ, რაც ზურგის პრობლემების მოხსნაშიც დამეხმარება. თუმცა ამის გაკეთება ისეთი ადვილი სულაც არ არის. მიუხედავად კვების საკმაოდ მოწესრიგებული რეჟიმისა, შენელებული მეტაბოლური პროცესები და ცხოვრების ნაკლებ აქტიური წესი მაინც თავისას შვრება და წონაში კლება ნამდვილად გამოწვევად იქცევა, თუმცა ეს მე არ მაშინებს და მცდელობას არ ვაკლებ. თქვენც ამავეს გირჩევდით.
ბოლოს კი გირჩევთ ივარჯიშოთ ჯანმრთელობის გასაუმჯობესებლად და არა ეგოისტური მიზნებიდან გამომდინარე. ადამიანები ნაკლებად ფიქრობენ ორგანიზმის სიჯანსაღეზე. ისინი ორიენტირებულნი არიან სხეულის ლამაზ ფორმებზე და ჯანმრთელობას ყურადღებას არ უთმობენ, რაც შეცდომაა. შუახნის ასაკი გაცილებით მალე მოდის, ვიდრე ელით. მას მზად უნდა შეხვდეთ და ორგანიზმი გაიძლიეროთ. ჩემს ასაკს რომ მიაღწევთ, ეს ნამდვილად გამოგადგებათ.
