რატომ ვერ იკლებთ წონაში - 15 შესაძლო მიზეზი

August 19, 2018 ნახვა 2663

წონაში კლებას ყოველთვის ახლავს თან გარკვეული გართულებები. შესაძლოა, საწყის ეტაპზე ძალიან მარტივად გამოემშვიდობოთ ზედმეტ კილოგრამებს, მაგრამ გარკვეული დროის შემდეგ, შესაძლებელია წონაში კლების პროცესი შენელდეს, ან სულაც შეწყდეს. ჩვენ გაგაცნობთ 15 ყველაზე გავრცელებულ მიზეზს, რომელთა გამოც წონაში კლების პროცესი რთულდება. ამასთან გთავაზობთ რჩევებსაც, რომლებიც დაგეხმარებათ არსებული წინაღობების გადალახვაში და გახდომას გაგიადვილებთ.

• შესაძლოა წონაში იკლებთ, მაგრამ ამას ვერ აცნობიერებთ

სავსებით ბუნებრივია, როდესაც დიეტას იწყებთ და აწონვისას კილოგრამების კლებას ვერ ამჩნევთ, რადგან სასწორი ისევ იმ ნიშნულზეა, როგორზეც ადრე იყო. კილოგრამები ამ მხრივ ზუსტ პასუხს ვერ გაგცემენ, რადგან აწონვისას თქვენი წონა დამოკიდებულია საკვებზე, რომელიც მიირთვით, ჰორმონალურ მდგომარეობაზე. ეს განსაკუთრებით ქალბატონებს ეხებათ, რადგან ციკლის პერიოდში სხეულის მასა სითხის შეკავების გამო მნიშვნელოვნად იმატებს. თუ თქვენ ცხიმებს წვავთ, სავარაუდოდ მუსკულატურა გეზრდებათ. ეს განსაკუთრებით ეხება მათ, ვისაც ვარჯიში ახალი დაწყებული აქვთ. წონაში კლება სწორედ ამას გულისხმობს, რომ ორგანიზმმა ზედმეტი ცხიმი დაწვას. სასწორს მეტისმეტად ნუ ენდობით, უმჯობესია თუ თქვენი სხეულის შესაფასებლად სხვა საშუალებებს მიმართავთ, მაგ. დააკვირდით, როგორ გადგათ ტანსაცმელი, როგორ გამოიყურებით სარკეში.

• თქვენ არ აღრიცხავთ  თქვენს ყოველდღიურ საკვებ რაციონს

თავდაჯერება და დარწმუნებულობა აუცილებელია. ადამიანებს ხშირად წარმოდგენა არ აქვთ სინამდვილეში რამდენს ჭამენ. კვლევებმა აჩვენა, რომ დღიურის წარმოება და საკვები რაციონის აღწერა წონაში კლებას მნიშვნელოვნად უწყობს ხელს. ადამიანები, რომლებიც კვების დღიურებს აწარმოებენ და ფოტოებს უღებენ საკვებს, რომელსაც მიირთმევენ, გაცილებით ადვილად იკლებენ, ვიდრე ისინი, ვინც ამას არ აკეთებს.

• თქვენ საჭირო რაოდენობის პროტეინს არ იღებთ

პროტეინი წონის კლებაში ერთ-ერთ გადამწყვეტ როლს ასრულებს. პროტეინის საკმაო რაოდენობით მიღება მეტაბოლიზმს მნიშვნელოვნად ააქტიურებს და კალორიების წვაში გეხმარებათ. ის ასევე აქვეითებს მადას და გამუდმებით წახემსების სურვილს გიქრობთ. პროტეინების მიღება განსაკუთრებით მნიშვნელოვანია საუზმემე. ის ვინც მაღალპროტეინულ საუზმეს მიირთმევს, ნაკლებად განიცდის შიმშილს და დღის მანძილზე გაცილებით ცოტას ჭამს. პროტეინი დაკლებული წონის ხელახალი მატებისგანაც დაგიცავთ.

• თქვენ მეტისმეტად ბევრ კალორიას იღებთ

ადამიანების უმრავლესობა, რომელთაც წონაში კლების პრობლემა აქვს, ჭარბი რაოდენობით კალორიებს იღებს. ადამიანები ხშირად ვერ ხვდებიან, რომ ისინი კალორიულ პროდუქტებს მიირთმევენ. იმისთვის, რომ ეს შეცდომა არ მოგივიდეთ კალორიების კალკულატორს ან მთვლელს მიმართეთ. აღნიშნული სერვისი ბევრ ონლაინ ვებ-გვერდს აქვს და მათი მეშვეობით კალორიების დათვლა გაგიმარტივდებათ. კალორიების აღრიცხვა ბევრ რამეში დაგეხმარებათ. მაგ. თქვენ შეძლებთ კალორიების 30 % მიიღოთ პროტეინების ხარჯზე.

• თქვენ უხარისხო პროდუქტს მიირთმევთ

პროდუქტის ხარისხს ძალიან დიდი მნიშვნელობა აქვს. ჯანსაღი საკვების მირთმევით თქვენ ორგანიზმის ჯანმრთელობას უწყობთ ხელს და მადასაც ირეგულირებთ. გადამუშავებულ პროდუქტებს ერიდეთ. ნუ ენდობით ეტიკეტებს, რომლებიც აღნიშნული პროდუქტების სარგებლიანობაზე მიგითითებენ. ეს სარწმუნო არ არის.

• თქვენ არ აკეთებთ აზიდვებს

წონაში დაკლება თუ გსურთ, წინაღობით ვარჯიშებს უნდა მიმართოთ, მაგ. აზიდოთ გარკვეული მასა. ეს ცხიმის წვას უწყობს ხელს და მეტაბოლური პროცესების შენელებას აფერხებს.

• თქვენ დიდი ულუფებით  იკვებებით (თუნდაც ჯანსაღი პროდუქტით)

დიეტის ერთ-ერთ გვერდით ეფექტს წარმოადგენს დიდი ულუფების მიღება ერთ ჯერზე და სწრაფად კვება. ეს უამრავ ადამიანს აწუხებს, რომლებიც დიეტაზე იმყოფებიან. ისინი ერთ ჯერზე ბევრს მიირთმევენ, რაც არ არის სასარგებლო, თუნდაც საკვებად ჯანსაღ პროდუქტებს იყენებდნენ, როგორებიცაა ყველი ან შავი შოკოლადი. ერთ მსგავს გადაცდენასაც კი შეუძლია მთელი კვირის დიეტა გაანეიტრალოს და მისი ეფექტი შეამციროს.

• თქვენ თავს არიდებთ კარდიოს

უცნაურია, მაგრამ კარდიოს წლების მანძილზე არასახარბიელო რეპუტაცია ჰქონდა. თუმცა ის უდიდეს როლს ასრულებს ორგანიზმის გაჯანსაღების პროცესში. მისი დახმარებით იწვება უსარგებლო ცხიმები და ადამიანი უმარავი დაავადებისგან ხდება დაცული.

• თქვენ კვლავ ეტანებით შაქრის შემცველ სასმელებს

ადამიანები ვერ აცნობიერებენ ტკბილი სასმელების უარყოფით ეფექტებს, რადგან ერთი შეხედვით არ არის საგრძნობი, თუ რა ზიანის მოტანა შეუძლიათ მათ. ეს არ ეხება მხოლოდ კოკა-კოლას ან პეფსის. ნებისმიერი შაქრის შემცველი სასმელი გასუქების უპირველეს მიზეზს წარმოადგენს. ტკბილი ხილის წვენიც კი ამ საფრთხის შემცველია. წონაში დაკლების მსურველებმა უარი უნდა თქვან ყველა სახის შაქრიან სასმელზე.

• თქვენ ცუდად გძინავთ

კარგი ძილი ერთ-ერთი უმთავრესი ძალაა ორგანიზმის ფიზიკური და მენტალური ჯანმრთელობისთვის, ისევე როგორც წონის პრობლემების მოსაგვარებლად. ადამიანებს, რომლებსაც ცუდად სძინავთ სიმსუქნის მაღალი მაჩვენებელი აქვთ. არასაკმარისი ძილის შემთხვევაში მოზრდილებსა და ბავშვებში წონაში მატების რისკი 55-89 %- ით მატულობს.

• თქვენ არ ზღუდავთ ნახშირწყლების მიღებას

ადამიანებს, რომლებსაც ბევრი კილოგრამი აქვთ დასაკლები, ან აწუხებთ დიაბეტი, დაბალნახშირწყლოვანი დიეტა ესაჭიროებათ. კვლევებმა აჩვენა, რომ მსგავსი ტიპის დიეტები 2-3- ჯერ ეფექტურები არიან, ვიდრე დაბალცხიმიანი დიეტები, რომლებსაც აქტიურად უწევენ რეკომენდაციას.

• თქვენ ძალიან ხშირად მიირთმევთ

სიცრუეა, თითქოს ყველა ადამიანმა დღეში რამდენიმეჯერ უნდა მიირთვას მცირე ულუფებით, რათა მეტაბოლური პროცესები გააქტიუროს და წონაში დაიკლოს. ხშირ კვებას ამ მხრივ ეფექტის მოხდენა არ შეუძლია. გაცილებით ეფექტურია რამდენიმე საათის მანძილზე ორგანიზმის დასვენება. მაგ. 15 საათის მანძილზე საკვების მიღებისგან თავის შეკავება.

• თქვენ არ სვამთ  საკმარისი რაოდენობის წყალს

წყლის მიღებას გახდომის მსურველთათვის უამრავი დადებითი ეფექტის მოტანა შეუძლია. 12 კვირიანმა კვლევამ, რომლებიც დიეტაზე მყოფ ადამიანებს ჩაუტარდათ, დაადასტურა, რომ ადამიანებმა, რომლებიც ჭამამდე ნახევარი საათით ადრე ნახევარ ლიტრ წყალს მიირთმევდნენ. წონაში 44 %- ით მეტად დაიკლეს, ვიდრე სხვებმა. წყლის მიღება კალორიების წვის პროცესს 24-30 %-ით ააქტიურებს.

• თქვენ აქტიურად მოიხმართ ალკოჰოლს

თუ ალკოჰოლი გიყვართ, წონაში კლება გაგიჭირდებათ, რადგან ლუდს, ღვინოსა და შაქრის შემცველ ალკოჰოლურ სასმელს მაღალი კალორიულობა აქვს. ალკოჰოლს დანამატების გარეშე ყოველ გრამზე 7 კალორია აქვს, რაც საკმაოდ მაღალია. ზომიერი სმა მისაღებია, თუმცა ამან არ უნდა მიიღოს რეგულარული ხასიათი.

• თქვენ გაქვთ ჯანმრთელობის პრობლემა, რომელიც მდგომარეობას ართულებს

არსებობენ დაავადებები, რომლებიც წონაში მატებას უწყობენ ხელს, ხოლო წონაში კლების პროცესს აფერხებენ. მათ რიცხვში შედის ჰიპოთირეოზი, საკვერცხეების პოლიკისტოზი და ძილის აპნოე. შესაძლოა წონაში მატება რომელიმე მედიკამენტმაც გამოიწვიოს. თუ მსგავსი ეჭვები გაქვთ, თქვენს ექიმს მიმართეთ და  პრობლემის მოგვარებაში ის დაგეხმარებათ .