იოგა წონაში კლებისთვის
ადამიანების უმრავლესობამ არაფერი იცის იმის შესახებ, რომ გარდა ფსიქიკური, მენტალური და სპირიტუალური განვითარების ხელშეწყობისა, იოგა წონაში კლების პროცესსაც აჩქარებს. განსაკუთრებით სასარგებლო ამ მხრივ აქტიური იოგაა. თუმცა შედარებით სტატიკური, რელაქსაციისთვის განკუთვნილი იოგას ნაირსახეობებიც, რომლებიც თავდაჯერებას გმატებთ, თავის მხრივ, წონაში კლებასაც ასტიმულირებენ. ზედმეტი კილოგრამებისგან გათავისუფლებაში იოგა სხვა და სხვა ფორმით გეხმარებათ.
იოგა და კონცენტრაცია
მენტალური და სპირიტუალური განვითარებისთვის განკუთვნილი იოგა კონცენტრაციის გაუმჯობესებაში გეხმარებათ, რაც თქვენს თავდაჯერებას მნიშვნელოვნად ზრდის. თქვენ გაცილებით საღად აზროვნებთ და შეგიძლიათ რაციონალურად გააანალიზოთ როგორ მოქმედებს ესა თუ ის საკვები თქვენს სხეულზე, გონებასა და განწყობებზე.
კვლევებით დადასტურდა, რომ ადამიანები, რომლებიც იოგას დახმარებით კონცენტრაციის განვითარებაზე ზრუნავენ, არაჯანსაღ პროდუქტებზე უარს ადვილად ამბობენ. ისინი გადაძღომისგანაც მარტივად იცავენ თავს. იოგა საუკეთესო დამხმარე საშუალებას წარმოადგენს იმ ადამიანებისთვის, რომლებიც ზედმეტი კილოგრამებისგან გათავისუფლებას სხვა და სხვა გზით ცდილობენ, მაგრამ წარმატების მიღწევა უჭირთ. კვლევებმა აჩვენა, რომ იოგა სხვა სახის ფიზიკურ აქტივობებსაც ახალისებს და იმპულსურ ადამიანებს მადის გაკონტროლებაში ეხმარება.
იოგას შესრულება სავსე მუცლით რეკომენდებული არ არის, სწორედ ამიტომ, თუ თქვენ გადაწყვეტთ, რომ იოგით აქტიურად დაკავდეთ, ჯანსაღ კვებით ჩვევებსაც განივითარებთ. ასე სრულყოფილად ვარჯიშს ადვილად შეძლებთ. იოგა სწორად კვების სასარგებლო უნარებს ჩამოგიყალიბებთ, მაგ. გასწავლით, რომ ლუკმა ძალიან ბევრჯერ უნდა დაღეჭოთ, რათა საკვების უკეთ მონელება შეძლოთ. შესაძლოა, თეორიულად ეს ისედაც კარგად იცით, მაგრამ იოგა პრაქტიკული უნარების განვითარებაში დაგეხმარებათ.
იოგა და უკეთესი ძილი
იოგით დაკავება ძილის მოწესრიგებაში დაგეხმარებათ. რეგულარული ვარჯიშის შედეგად ჩაძინება მნიშვნელოვნად გაგიმარტივდებათ, ხოლო ძილის ხარისხი გაუმჯობესდება. თქვენ უფრო ღრმად და ხანგრძლივად დაძინებას შეძლებთ. დღე-ღამის მანძილზე თქვენ საშუალოდ 6-9 საათით დაძინებას ნამდვილად მოახერხებთ. ხარისხიანი ძილი წონაში კლების პროცესს ახალისებს. კვლევებმა აჩვენა, რომ ადამიანები, რომლებიც ძილის ნაკლებობას უჩივიან, ზედმეტი კილოგრამებისგან გათავისუფლებას რთულად ახერხებენ, რადგან უძილობა ცხიმის წვის პროცესს აფერხებს.
იოგა-ნიდრა მწოლიარე პოზიციაში სრულდება და რელაქსაციისთვის გამოიყენება. ის ღრმად ჩაძინებაშიც გეხმარებათ და კონცენტრაციის ხარისხსაც გიუმჯობესებთ. მისი დახმარებით ახალი მიზნების დასახვას და მათ მიღწევასაც ბევრად მარტივად შეძლებთ. კვლევებით დადასტურდა, რომ იოგა-ნიდრა ადამიანებს საკუთარი საქმის უკეთ კეთებაში ეხმარება და მათ თავდაჯერებას მნიშვნელოვნად ზრდის.
იოგა და კალორიების წვის პროცესი
იოგა აერობული დატვირთვა ნამდვილად არ არის, თუმცა არსებობს მისი ნაირსახეობები, რომლებიც სხვებთან შედარებით ფიზიკურად მეტად გტვირთავთ. აქტიური და ინტენსიური იოგას შესრულებისას თქვენ კალორიების დაწვას მარტივად ახერხებთ. აშთანგა ან ვინიასა იოგას შესრულება თქვენგან მეტ ფიზიკურ მზაობას მოითხოვს. ამ ორი ტიპის იოგას შესრულება წონის კლებაში დაგეხმარებათ, რადგან ფიზიკურად სათანადოდ დაიტვირთებით.
იოგას შესრულება მეტაბოლიზმის გაუმჯობესებასაც უწყობს ხელს და კუნთების ტონუსში მოყვანასაც უზრუნველყოფს. მართალია, მსუბუქი იოგა თქვენგან განსაკუთრებულ ფიზიკურ მზაობას არ საჭიროებს, მაგრამ წონის დაკლებაში ისიც გეხმარებათ. მსუბუქი იოგა განსაკუთრებით სასარგებლო ჭარბწონიანი ქალბატონებისთვისაა, ასევე იმ ადამიანებისთვის, ვისაც მუცლის არეში ზედმეტი ცხიმების დაგროვების პრობლემა აქვს.
რამდენად ხშირად უნდა დაკავდეთ იოგით, რათა წონაში დაკლება შეძლოთ?
იოგით იმდენად ხშირად უნდა დაკავდეთ, რამდენადაც შეძლებთ. უფრო აქტიური, ინტენსიური დატვირთვა კვირაში 3-4-ჯერ მაინც დაგჭირდებათ. იოგას თითოეულ ჯერზე 1 საათი მაინც უნდა დაუთმოთ. დანარჩენ დღეებში იოგას უფრო მსუბუქი ნაირსახეობები შეარჩიეთ და რელაქსაციის ვარჯიშები შეასრულეთ. ყველაზე სასარგებლო ამ მხრივ ჰათჰა იოგაა. თუ დამწყები იოგი ხართ, თქვენი უნარები ნელ-ნელა და თანმიმდევრულად დახვეწეთ. თავდაპირველად ძალისა და მოქნილობის განვითარებაზე უნდა იზრუნოთ, რათა ვარჯისისას დაზიანების მიღებისგან თავის დაზღვევა შეძლოთ. გულ-სისხლძარღვთა სისტემის მუშაობის გასაუმჯობესებლად, იოგასთან ერთად ისეთი აქტივობებითაც დაკავდით, როგორებიცაა სეირნობა, ცურვა, ველოსიპედით სიარული.
იოგას კლასის შემდეგ ნუ აიწონებით. რადგან ვარჯიშისას დიდი რაოდენობით სითხეს კარგავთ, სასწორის მაჩვენებელი შესაძლოა სიმართლეს არ შეესაბამებოდეს. შეცდომების თავიდან ასაცილებლად, უმჯობესია, წონა ყოველდღიურად ერთსა და იმავე დროს გადაიმოწმოთ.
ვარჯიშები, რომელთა შესრულება სახლშიც შეგიძლიათ
თუ იოგაზე სიარულს ვერ ახერხებთ, შეგიძლიათ გარკვეული მოძრაობები სახლშიც შეასრულოთ. გთავაზობთ რამდენიმე მათგანს.
მზის მისალმება
მზის მისალმება სულ ცოტა 10-ჯერ მაინც უნდა გააკეთოთ. ინტენსივობის გასაზრდელად შეგიძლიათ პოზები დიდხანს შეინარჩუნოთ ან უფრო სწრაფად იმოძრაოთ. სწორად დადექით, ხელები თავს ზემოთ აზიდეთ და წინ გადაიხარეთ. ხელები ნელ-ნელა დაუშვით და დაიხარეთ. დაშვებისას თქვენი მოძრაობა მსუბუქი უნდა იყოს. ფეხები უკან წაიღეთ და პლანკა გააკეთეთ. აღნიშნულ პოზიციაში 5 ამოსუნთქვამდე გაჩერდით. ფეხები მუხლებში მოხარეთ, მუხლებით იატაკს შეეხეთ, შემდეგ მთელი სხეულით დაბლა დაეშვით. ფეხის წვერები ხალიჩაზე დააბჯინეთ, ხელები კი მხრებს ქვემოთ გქონდეთ. წამოიწიეთ და კობრას პოზა დააფიქსირეთ. შუაწელი მაღლა აზიდეთ და ფეხებით და ხელებით იატაკს დაეყრდენით. თავი ხალიჩისკენ მიმართეთ. მოცემულ პოზაში 5 ამოსუნთქვამდე გაჩერდით. წამოდექით, ფეხებით იატაკს დაეყრდენით, ნაბიჯი წინ გადადგით და გასწორდით. შემდეგ ყველა მოძრაობა თავიდან გაიმეორეთ.
ნავის პოზა
მოცემული პოზა თქვენს მთელ სხეულს ტვირთავს, ის განსაკუთრებით ავითარებს ტორსს და სტრესის დაძლევაში გეხმარებათ. დაჯექით, ფეხები ერთმანეთს მიაბჯინეთ და ხალიჩაზე დააწყვეთ. ორივე ფეხი მოხარეთ და მაღლა აზიდეთ. ფეხის ქვედა ნაწილი იატაკის პარალელურად უნდა გეჭიროთ, ხოლო ბარძაყებმა ხალიჩასთან მახვილი კუთხე უნდა შექმნას. ხელები მაღლა აზიდეთ და მხრების სიმაღლეზე გააჩერეთ. ორივე ხელი წინ მიმართეთ და იატაკის პარალელურად გეჭიროთ. თუ შეძლებთ, ტორსის მაღლა აზიდვისას, ფეხები გაასწორეთ. მოცემულ პოზაში 30 წამის მანძილზე უნდა გაჩერდეთ. აღნიშნული ვარჯიში სულ ცოტა 5-ჯერ მაინც უნდა შესრულდეს.
პლანკა
პლანკის სხვა და სხვა ვარიაციის შესრულებას შეგიძლიათ 10-20 წუთი დაუთმოთ. ხელებით იატაკს დაეყრდენით. ხელისგულები ხალიჩაზე დააწყვეთ. ორივე ფეხი მუხლში მოხარეთ და ფეხის ქვედა ნაწილით ხალიჩას დაეყრდენით. ფეხის წვერები იატაკს მიაბჯინეთ და ფეხები ნელ-ნელა მაღლა აზიდეთ. სხეულით ერთი მთლიანი, სწორი ხაზი უნდა შექმნათ. მეტი სიზუსტისთვის, უმჯობესია, თუ ვარჯიშს სარკის წინ შეასრულებთ. ფეხის,მხრებისა და ტორსის კუნთები დაძაბეთ. მოცემულ პოზაში 1 წუთამდე უნდა გაჩერდეთ.
თუ იოგა წონაში დასაკლებად გჭირდებათ, ეცადეთ იყოთ მაქსიმალურად თანმიმდევრული და სტაბილური. თქვენს რუტინაში ცვლილებები ნელ-ნელა შეიტანეთ და დატვირთვა გააძლიერეთ. არ მოდუნდეთ და თქვენი შესაძლებლობების მაქსიმუმი გამოიყენეთ. როდესაც თავდაჯერებას მოიპოვებთ, დაინახავთ, რომ თქვენი მიდრეკილება ჯანსაღი ცხოვრების წესისა და ჯანსაღი საკვებისადმი ბუნებრივად იზრდება. იოგა პოზიტიური აზროვნების ჩამოყალიბებასა და განწყობის გაუმჯობესებაში დაგეხმარებათ, რაც წონაში კლების პროცესს გაგიმარტივებთ.
წარმატებებს გისურვებთ!
