ქრონიკული დაღლილობის შეგრძნება ვარჯიშის დროს - 7 სავარაუდო მიზეზი
დარბაზში მოტივირებული, პოზიტიური განწყობით და სასიამოვნო მოლოდინებით სავსე მიდიხართ, მაგრამ ვარჯიშის დაწყებიდან რამდენიმე წუთში ხვდებით, რომ ძალა გამოგეცალათ, ენერგია აღარ გაქვთ და საშინელი დაღლილობის შეგრძნება გაწუხებთ. აღნიშნული პრობლემა დარბაზში მოსიარულე ადამიანთა აბსოლუტური უმრავლესობისთვის ნაცნობია, რადგან კარგი და ცუდი დღეები ცხოვრებაში ყველას აქვს, თუმცა თუ ვარჯიშის დროს დაღლილობის შეგრძნება ქრონიკულად გაწუხებთ, გირჩევთ, ეს არასასიამოვნო სიმპტომი უყურადღებოდ არ დატოვოთ.
მედიცინის ექსპერტების აზრით, პერმანენტულ დაღლილობას ყოველთვის აქვს გამომწვევი მიზეზი, რომლის დადგენა აუცილებელია, რათა მომავალში სერიოზული გართულებების თავიდან აცილება შეძლოთ. თუ გრძნობთ, რომ თქვენი ცხოვრების ხარისხი მნიშვნელოვნად გაუარესდა, აცნობიერებთ, რომ ნორმალურად ვარჯიშს ვეღარ ახერხებთ და იძულებული ხართ რეგულარულ დატვირთვაზე უარი განაცხადოთ, კონსულტაციისთვის მკურნალ ექიმს მიაკითხეთ. სტატიაში ქრონიკული დაღლილობის გამომწვევ 7 სავარაუდო მიზეზზე გესაუბრებით.
თქვენ არასრულფასოვნად გძინავთ
ვარჯიშის დროს უძლურების შეგრძნება და ხშირი თავბრუსხვევა, შესაძლოა, ძილის ნაკლებობით იყოს გამოწვეული. ცნობილია, რომ ახალგაზრდების უდიდეს ნაწილს დღე-ღამის განმავლობაში 7 საათზე ნაკლები ძინავს. უძილობა, თავის მხრივ, ქრონიკული სტრესის გამომწვევ მთავარ მიზეზად გვევლინება. როდესაც ადამიანს სრულფასოვნად არ ძინავს, მის ორგანიზმში დიდი რაოდენობით ადრენალინი და კორტიზოლი გამომუშავდება. სტრესის ჰორმონი დღის განმავლობაში ადამიანის ორგანიზმის ნორმალურ ფუნქციონირებას უზრუნველყოფს. მაღალი ინტენსივობის ვარჯიშების შესრულებისას (მაგ. მაღალი ინტენსივობის ინტერვალური ვარჯიში) სტრესის ჰორმონის მაჩვენებელი უფრო და უფრო იმატებს, რაც სისუსტისა და დაღლილობის შეგრძნებას იწვევს, რადგან ორგანიზმს ძალების დამოუკიდებლად აღდგენის უნარი აღარ შესწევს. ძილის ხარისხის გასაუმჯობესებლად, უმჯობესია, იოგას და მედიტაციას მიმართოთ. უახლესი კვლევებით დასტურდება, რომ ძილის დარღვევების მქონე ადამიანებს მედიტაცია უძილობასთან ბრძოლაში ძალიან ეხმარება.
გამოიკვლიეთ ფარისებრი ჯირკვალი
ენერგიის ნაკლებობას ხშირად ის ადამიანები უჩივიან, რომლებსაც ფარისებრი ჯირკვლის დისფუნქცია აწუხებთ. აღსანიშნავია ისიც, რომ ფარისებრი ჯირკვლის პრობლემების მქონე ადამიანების სამოცმა პროცენტმა საკუთარი ჯანმრთელობის მდგომარეობის შესახებ არაფერი იცის. თუ სისხლში გარკვეულ ჰორმონთა ნორმალური მაჩვენებელი დაირღვა, მეტაბოლიზმი სერიოზულად შეფერხდება, რაც ორგანიზმში ყოველდღიური ფუნქციონირებისთვის საჭირო ენერგიის მარაგის დეფიციტს შექმნის. თუ ფარისებრი ჯირკვლის მიერ ჰორმონთა წარმოების პროცესი შესუსტდა, თქვენ ქრონიკული დაღლილობის შეგრძნება აუცილებლად შეგაწუხებთ. შესაძლოა, რიგ ჰორმონთა მაჩვენებელი დაქვეითების ნაცვლად მეტისმეტად გაიზარდოს, რაც ენერგიის საოცარ მოზღვავებას გაგრძნობინებთ, თუმცა გარკვეული დროის შემდეგ იგრძნობთ, რომ კუნთოვან მასას კარგავთ, ხშირად ავადმყოფობთ და ჯანმრთელობის სხვა და სხვა პრობლემა გაქვთ. ფარისებრი ჯირკვლის დისფუნქციის თავიდან ასაცილებლად თქვენი რაციონი მინერალებით გაამდიდრეთ. მიიღეთ საჭირო რაოდენობის თუთია, სელენი, რკინა და იოდი. ფარისებრი ჯირკვლის უკეთ ფუნქციონირებისთვის საჭირო განსაკუთრებით სასარგებლო პროდუქტთა რიცხვს მიეკუთვნება: თევზი, კვერცხი, ზღვის მარილი და ზღვის წყალმცენარეები (საკვებად ვარგისი). თუ ფარისებრი ჯირკვალი გაწუხებთ, თქვენთვის ძალიან სასარგებლოა ბუნებაში ხშირად გასვლა, მედიტაცია და ძილის რეჟიმის მოწესრიგება.
დეჰიდრატაცია ქრონიკულ დაღლილობას იწვევს
ჰიდრატაციის დაბალი მაჩვენებელი ვარჯიშის დროს თავბრუსხვევის გამომწვევ ერთ-ერთ მიზეზად გვევლინება. როდესაც ფიზიკურად იტვირთებით, თქვენი გულისცემის სიხშირე მატულობს. სითხეების არასაკმარისი მიღება გულის მუშაობის ხარისხზე უარყოფითად აისახება. ვარჯიშის დროს თქვენს კუნთებს საჭირო რაოდენობის ჟანგბადი და მკვებავი ნივთიერებები უნდა მიეწოდოს, რაც დეჰიდრატაციის პირობებში ვერ ხერხდება. ფიზიკური დატვირთვით გამოწვეული ოფლისდენა თქვენი ორგანიზმიდან ელექტროლიტებს გამოდევნის. ნატრიუმისა და კალიუმის დანაკარგი, თუ მათი შევსება არ ხდება, ორგანიზმის ნორმალურად ფუნქციონირებას შეუძლებელს ხდის. ყურადღება მიაქციეთ ჰიდრატაციის ხარისხს. თუ თქვენი შარდი მოყვითალო ან ღია შეფერილობისაა, ე.ი. წყალს სათანადო რაოდენობით იღებთ, თუ მას მუქი ფერი აქვს, თქვენ დეჰიდრატაციის პრობლემის წინაშე დგახართ. ყოველდღიურად მიიღეთ საჭირო რაოდენობით წყალი, რათა ძალისა და ენერგიის ნაკლებობამ არ შეგაწუხოთ.
თქვენ საჭირო რაოდენობის ნახშირწყლებს არ იღებთ
თუ თქვენ ზედმეტი კილოგრამებისგან გათავისუფლებას ცდილობთ და დაბალნახშირწყლოვან დიეტაზე ხართ, საკვების სახით ვარჯიშისთვის საჭირო ენერგიას ვერ მიიღებთ. ადამიანის სხეული ენერგიას ძირითადად გლუკოზის დახმარებით იღებს. ნახშირწყლები, რომლებსაც ადამიანი საკვებად იყენებს, ორგანიზმში მოხვედრისას იშლება და გლუკოზად გარდაიქმნება. ვარჯიშისთვის საჭირო ენერგია რომ გქონდეთ, არც ცილებისა და ცხიმების რეგულარულ მიღებაზე თქვათ უარი. მაღალი ინტენსივობის ვარჯიშების შესრულებისას სისხლში გლუკოზის დაბალი შემცველობა თავბრუსხვევას და სისუსტეს იწვევს. სწორედ ამიტომ, აუცილებლად უნდა მიიღოთ საჭირო რაოდენობის ნახშირწყლები, რათა ვარჯიშისთვის საჭირო ძალა და ამტანობა გქონდეთ. თუ დაბალნახშირწყლოვან დიეტას მკაცრად იცავთ და მას ვერ უღალატებთ, სავარჯიშო რუტინა შეცვალეთ. უპირატესობა დაბალი ინტენსივობის ვარჯიშებს მიანიჭეთ.
ძალების აღდგენას სათანადო დროს არ უთმობთ
თუ დარბაზში ყოველდღიურად დადიხართ და საერთოდ არ ისვენებთ, ძალა აუცილებლად გამოგეცლებათ. კუნთების გამუდმებული სისუსტე ქრონიკული სტრესის ერთ-ერთი მთავარი ნიშანია. უკონტროლო ვარჯიში ოქსიდაციური სტრესის გამომწვევ მიზეზად იქცევა. ოქსიდაციური სტრესი უჯრედებს აზიანებს და ორგანიზმისთვის დამღუპველია. ზედმეტ დატვირთვას არამხოლოდ თქვენი სხეულის დაზიანების უნარი შესწევს, ის თქვენს ფსიქიკურ ჯანმრთელობაზეც უარყოფითად ზემოქმედებს. ადამიანები, რომლებიც უკონტროლოდ ვარჯიშობენ, დეპრესიისკენ მიდრეკილებას ავლენენ. ორგანიზმის ნორმალური ფუნქციონირებისთვის დასვენება და ძალების აღდგენა აუცილებელია. გამოყავით დრო განტვირთვისთვის. დააბალანსეთ თქვენი დღის რეჟიმი. თუ უქმად ჯდომა არ შეგიძლიათ, ძალების აღსადგენად იოგა ან სხვა მსუბუქი ვარჯიშები გამოიყენეთ.
რკინის დეფიციტი ქრონიკული დაღლილობის კიდევ ერთი მიზეზია
საკვები რაციონიდან ხორცისა და ცხოველური პროდუქტების გამორიცხვა ორგანიზმში რკინის დეფიციტს იწვევს. ანემია, შესაძლოა, სისხლის დიდი რაოდენობით დაკარგვითაც იყოს გამოწვეული. თუ თქვენს ორგანიზმს რკინა აკლია, თავბრუსხვევა, დაღლილობა და სისუსტე ყოველდღიურად შეგაწუხებთ. თუ ანემია გაქვთ, თქვენი ტვინი საჭირო რაოდენობის ჟანგბადს ვერ იღებს, რაც მას ნორმალურ ფუნქციონირებაში ხელს უშლის. ანემიის თავიდან ასაცილებლად, რკინით მდიდარი პროდუქტები რეგულარულად უნდა მიიღოთ. საკვებ პროდუქტებში რკინა ორი სახით გვხვდება: ჰემშემცველი (დიდი რაოდენობით გვხვდება ხამანწკებში, საქონლის, ინდაურისა და ქათმის ხორცში), რომლის ათვისება ორგანიზმს უადვილდება და არაჰემშემცველი(დიდი რაოდენობით გვხვდება მუქი შეფერილობის ფოთლოვან ბოსტნეულში, ლობიოში, ოსპში, თევზსა და ბროკოლში), რომლის ათვისება ორგანიზმს უძნელდება. აღნიშნული სახის რკინის სრულყოფილად ასათვისებლად, დარწმუნდით, რომ ორგანიზმში C ვიტამინის დეფიციტი არ გაქვთ.
დაღლილობა მედიკამენტების მიღებით გამოწვეული გვერდითი ეფექტის გამოვლინებაა
გარკვეული მედიკამენტების მიღებამ, შესაძლოა, ქრონიკული დაღლილობა და სისუსტე გამოიწვიოს. ზოგიერთი სამკურნალო პრეპარატი არტერიულ წნევას აქვეითებს და გულისცემას აჩქარებს. ყურადღებით გაეცანით თქვენ მიერ მიღებული მედიკამენტების ანოტაციებს. თუ აღმოაჩენთ, რომ რომელიმე მათგანი დაღლილობას იწვევს ან არტერიულ წნევას აქვეითებს, მისი მიღების შემდეგ დარბაზში წასვლას ნუ ეცდებით. თუ დაღლილობა და თავბრუსხვევა მაინც შეგაწუხებთ, დახმარებისთვის თქვენს მკურნალ ექიმს მიმართეთ. ის თქვენი ჯანმრთელობის მდგომარეობის გასაუმჯობესებლად ალტერნატიულ მედიკამენტს გამოგიწერთ. წამლის მიღების შეწყვეტასთან დაკავშირებით გადაწყვეტილებას დამოუკიდებლად ნუ მიიღებთ. თუ პროფესიონალი პერსონალური ტრენერი გყავთ, შეგიძლიათ, რჩევა მასაც ჰკითხოთ. აუცილებლად მიაწოდეთ მას ამომწურავი ინფორმაცია თქვენი ჯანმრთელობის მდგომარეობის შესახებ. თქვენი პირადი ინსტრუქტორი თქვენთვის ნაკლებად დამღლელი სავარჯიშო რუტინის შემუშავებაში დაგეხმარებათ.
წარმატებებს გისურვებთ!
