იოგა სექსუალური ცხოვრების გასაუმჯობესებლად - 8 ეფექტური ვარჯიში ქალბატონებისთვის
ქალბატონების საკმაოდ დიდ ნაწილს სექსის დროს სიამოვნების მიღება უჭირს. კონცენტრაციის ნაკლებობის, არასწორად შერჩეული პარტნიორის, განწყობის არქონის ან სხვა უსიამოვნებების გამო ქალებს ანორგაზმიის პრობლემა ხშირად აწუხებთ. როდესაც სხეულის კომპოზიციის გამოსწორებაზე ვზრუნავთ, ჩვენ კუნთოვანი მასის გაზრდისა და ცხიმის წვის მიზნით ფიზიკურ დატვირთვას მივმართავთ. სწორედ ასევე შეგვიძლია სექსუალური ცხოვრების გასაუმჯობესებლად მენჯის დიაფრაგმის სპეციალური ვარჯიშები გამოვიყენოთ.
ქალბატონებს წლების მატებასთან ერთად მენჯის ძვლები უფართოვდებათ. ეს განსაკუთრებით იმ ქალებს ეხებათ, რომლებიც შვილებს აჩენენ. როდესაც ძვლები ერთმანეთს თანდათანობით შორდება, მენჯის დიაფრაგმის კუნთებზე მათი ზეწოლა მატულობს, რაც აღნიშნულ კუნთებს შორის კავშირის გაწყვეტას იწვევს. თუ მენჯის დიაფრაგმის კუნთების გასავარჯიშებლად სათანადო დროს გამონახავთ, აღმოაჩენთ, რომ თქვენი სექსუალური ცხოვრება მნიშვნელოვნად გამოსწორდება. გარდა ამისა, მენჯის დიაფრაგმისთვის განკუთვნილი ვარჯიშების წყალობით მოშვებული მუცლის ქვედა ნაწილის დახვეწას და ზურგის ქვედა ნაწილის გაძლიერებასაც შეძლებთ. თუ ვარჯიშისთვის მცირე დრო მაინც გაქვთ, ეს შესაძლებლობა აუცილებლად უნდა გამოიყენოთ. კეგლის ვარჯიშებისა და იოგას კომბინირებით მენჯის დიაფრაგმის კუნთების გავარჯიშებას ძალიან სწრაფად შეძლებთ და შედეგითაც კმაყოფილი დარჩებით.
- პლანკა მუხლის წინ წამოწევით
დასაწყისისთვის პლანკა დააფიქსირეთ და ისეთი პოზა მიიღეთ, თითქოს აზიდვების შესრულებას გეგმავდეთ. კისრიდან ფეხის წვერებამდე თქვენმა სხეულმა ერთი სწორი ხაზი უნდა შექმნას. ხელებით ხალიჩას დაეყრდენით და ორივე ხელი გაასწორეთ. მარცხენა ფეხი წინ გასწიეთ და მუხლში მოხარეთ. მუხლის წვერით მარცხენა ხელის იდაყვს უნდა შეეხოთ. ეცადეთ მენჯის არე უძრავად და სტატიკურად გეჭიროთ. სწორი პოზის დასაჭერად, ყურადღება თქვენს ბარძაყებზე გადაიტანეთ. ორივე ბარძაყის წინა მხარე იატაკისკენ უნდა იყოს მიმართული. ორივე მათგანი თანაბარ სიმაღლეზე უნდა გააჩეროთ. როდესაც ჩაისუნთქავთ, მკერდი წინ გამოსწიეთ, ამოსუნთქვისას ბარძაყები უნდა დაძაბოთ და მენჯის სარტყელი მაღლა აზიდოთ. 3 ჩასუნთქვისა და ამოსუნთქვის შემდეგ მოძრაობა მეორე მხარეს უნდა შეასრულოთ. ეს ერთი გამეორებაა.
- მებრძოლის პოზა II
დადექით სწორად. ხელები გაშალეთ და ხელისგულები დაბლა მიმართეთ. ორივე ხელი სწორად უნდა გეჭიროთ და ხელებით ერთი ხელისგულიდან მეორე ხელისგულამდე სწორი ხაზი უნდა შექმნათ. თავი გვერდით მიმართეთ. მარჯვენა ფეხი მუხლში მოხარეთ. მარჯვენა ბარძაყი იატაკის პარალელურ მდგომარეობაში უნდა აღმოჩნდეს. მარცხენა ფეხი გვერდით გადგით და გაასწორეთ. მარცხენა ფეხის წვერი წინ მიმართეთ. მარჯვენა ფეხის ბარძაყი მტკიცედ უნდა გეჭიროთ და არ ამოძრაოთ. თავი მარჯვენა მხარეს შეაბრუნეთ და პირდაპირ იყურეთ. მოცემულ პოზაში 10-12 ჩასუნთქვა-ამოსუნთქვის განმავლობაში უნდა გაჩერდეთ.
- მებრძოლის II პოზის ვარიაცია
დადექით სწორად, შემდეგ კი მარჯვენა ფეხი გვერდით გადადგით და მუხლში მოხარეთ. მარჯვენა ბარძაყი იატაკის პარალელურად უნდა გეჭიროთ. მარცხენა ფეხი გვერდით გადგით და ძირს დაუშვით, მაგრამ მუხლში არ მოხაროთ. ტორსი მარჯვნივ გადახარეთ და თავი მაღლა მიმართეთ. მარჯვენა ხელი ძირს დაუშვით და თითის წვერებით ხალიჩას შეეხეთ. მარჯვენა ხელისგული წინ უნდა იყოს მიმართული. მარცხენა ხელი მაღლა აზიდეთ და იდაყვი ბოლომდე გაშალეთ. აღნიშნული პოზა 10-12 ჩასუნთქვა-ამოსუნთქვის განმავლობაში უნდა შეინარჩუნოთ.
- ნაბიჯი და მებრძოლის III პოზა
დადექით სწორად, ხელები თეძოების გასწვრივ გეჭიროთ. მარჯვენა ფეხი მუხლში მოხარეთ და წინ გადადგით. ბალანსის მისაღწევად მთელი სხეულით მარჯვენა ფეხის ტერფს დაეყრდენით. მარჯვენა ფეხის ბარძაყი იატაკის პარალელურ მდგომარეობაში უნდა აღმოჩნდეს. მუხლი კოჭის გასწვრივ უნდა გეჭიროთ და უფრო წინ არ უნდა გაგექცეთ. მენჯის სარტყელი სტატიკურ პოზას უნდა ინარჩუნებდეს. ყურადღება მიაქციეთ ბარძაყებს. ორივე ფეხის ბარძაყის წინა მხარე პირდაპირ უნდა გქონდეთ მიმართული და თანაბარ სიმაღლეზე გეჭიროთ. კუდუსუნის ძვალი დაბლა დაუშვით და იატაკს მიუახლოვეთ. ორივე ბარძაყის გარეთა მხარე მყარად უნდა დაიჭიროთ. დუნდულების კუნთებიც მაქსიმალურად დაძაბეთ. ჩასუნთქვისას კონცენტრაცია თქვენი ზურგის მდგომარეობაზე გადაიტანეთ. როდესაც ამოისუნთქავთ, მენჯის დიაფრაგმა მაღლა უნდა აზიდოთ. ამოსუნთქვისას თქვენი მუცლის ქვედა ნაწილში მსუბუქი შეკუმშვები უნდა იგრძნოთ. აღნიშნული პოზა 8-10 ჩასუნთქვა-ამოსუნთქვის განმავლობაში უნდა დააფიქსიროთ.
- მებრძოლის III პოზის ვარიაცია
დადექით სწორად. ხელები თეძოების გასწვრივ გეჭიროთ. ფეხები გაასწორეთ და წინ იყურეთ. შემდეგ ნელა აზიდეთ მარცხენა ფეხი მაღლა და უკანა მიმართულებით წაიღეთ. მთელი სხეული მარჯვენა ფეხს უნდა დააყრდნოთ. მარცხენა ფეხის თითის წვერები იატაკისკენ უნდა მიმართოთ. ტორსით წინ გადაიხარეთ და სახით იატაკს უყურეთ. ხელისგულები ერთმანეთს მიაბჯინეთ და მკერდის გასწვრივ დაიჭირეთ. მენჯის დიაფრაგმა კვლავ სტატიკურ პოზიციას უნდა ინარჩუნებდეს. როდესაც ჩაისუნთქავთ მკერდი წინ უნდა გამოსწიოთ და ფეხი მტკიცედ გეჭიროთ. ამოსუნთქვისას კი მუცლის ქვედა ნახევარი მაღლა ამოსწიეთ და ბარძაყები დაძაბეთ. აღნიშნული პოზა 8-9 ამოსუნთქვისა და ჩასუნთქვის განმავლობაში მყარად უნდა შეინარჩუნოთ.
- ხის პოზა
მებრძოლის III პოზიდან ხის პოზაზე უნდა გადაინაცვლოთ. როდესაც ბოლოჯერ ჩაისუნთქავთ, ტორსი მაღლა უნდა აზიდოთ. მარჯვენა ფეხი გაასწორეთ, მარცხენა კი მაღლა აზიდეთ, მარცხენა მუხლი მოხარეთ და იატაკისკენ მიმართეთ. მარცხენა ფეხის ტერფით მარჯვენა ფეხის ბარძაყის შიდა მხარეს უნდა დაეყრდნოთ. მთელი სხეულის სიმძიმე მარჯვენა ფეხის ტერფზე უნდა გადაიტანოთ. ტორსი გაასწორეთ და უძრავად გეჭიროთ. ორივე ხელი მაღლა აზიდეთ და იდაყვები ბოლომდე გაშალეთ. ხელისგულები ერთმანეთისკენ მიმართეთ და წინ იყურეთ. ბალანსის შესანარჩუნებლად მარცხენა ფეხის ტერფი მარჯვენა ფეხის ბარძაყის შიდა მხარეს არ უნდა მოაშოროთ. მენჯის დიაფრაგმა არ ამოძრაოთ. ბარძაყის გარეთა მხარე დაძაბეთ. მოცემული პოზა 10 ჩასუნთქვა-ამოსუნთქვის განმავლობაში უნდა შეინარჩუნოთ.
- გვერდითი პლანკა
დასაწყისისთვის გვერდითი პლანკა დააფიქსირეთ. მაჯები მხრების გასწვრივ უნდა გეჭიროთ. მარჯვენა ხელისგულით ხალიჩას დაეყრდენით. წინ იყურეთ და თავი არ ამოძრაოთ. მენჯის დიაფრაგმა წინ უნდა მიმართოთ და ხის პოზა დააფიქსიროთ. მარჯვენა ფეხი გაშალეთ და ტერფით ხალიჩას დაეყრდენით. ფეხის თითების წვერები წინ უნდა მიმართოთ. მარცხენა ფეხი მაღლა აზიდეთ. ბარძაყის შიდა მხარე წინ მიმართეთ, მუხლი მოხარეთ და ფეხის ტერფი მარჯვენა ფეხის ბარძაყს შიდა მხარეს მიაბჯინეთ. მარცხენა ხელი მაღლა აზიდეთ და თითები მაღლა მიმართეთ. ხელისგული წინა მხარეს შემოაბრუნეთ. მოცემული პოზა 8-9 ჩასუნთქვისა და ამოსუნთქვის განმავლობაში შეინარჩუნეთ, შემდეგ კი კვლავ პლანკის საწყის პოზიციას დაუბრუნდით. ეს ერთი გამეორებაა. ვარჯიში იმავე თანმიმდევრობით მეორე მხარესაც უნდა შესრულდეს.
- მარტოსული ფრინველის პოზა
დასაწყისისთვის პლანკა დააფიქსირეთ. ხელები იდაყვებში მოხარეთ და ორივე მათგანით ხალიჩას დაეყრდენით. თავი ხელებზე დადეთ, მარცხენა ფეხი მუხლში მოხარეთ და მუხლის თავი მარცხენა ხელის იდაყვს მიუახლოვეთ. მარჯვენა ფეხი გაასწორეთ და უკან მიმართეთ. მარჯვენა ფეხისგული ზემოთ უნდა იყოს მიმართული. ზურგი გაასწორეთ და ტორსი მტკიცედ გეჭიროთ. მენჯის დიაფრაგმა კვლავ ნეიტრალურ პოზას უნდა ინარჩუნებდეს. თუ მსგავს პოზიციაში მენჯის მტკიცედ დაჭერა გირთულდებათ, მენჯის დიაფრაგმის ქვემოთ მცირე ზომის ბალიში დაიდეთ, რათა აღნიშნულ არეალში დაძაბულობა შემცირდეს. თუ ბარძაყის წინა მხარე იატაკს არ ეხება, ვარჯიშისას ხალიჩა დააფინეთ. როდესაც ფრინველის პოზას დააფიქსირებთ, მსუბუქად და თავისუფლად ისუნთქეთ. 1-2 წუთის მანძილზე რამდენიმე ჩასუნთქვა-ამოსუნთქვა შეასრულეთ. ეს ერთი გამეორებაა. ვარჯიში იმავე თანმიმდევრობით მეორე მხარესაც უნდა შესრულდეს.
წარმატებებს გისურვებთ!
