ვარჯიში კუნთების ტკივილის დროს
კუნთების ტკივილის დროს რეგულარული და ენერგიული სავარჯიშო რუტინის ერთგულება ძალიან ბევრ ათლეტს უძნელდება. თუ მსგავსი პრობლემა გაწუხებთ, მაგრამ ფორმაში დარჩენას აქტიურად ცდილობთ, შეცდომების თავიდან ასაცილებლად თქვენი ცოდნა და გამოცდილება უნდა გამოიყენოთ. თუ თქვენ დარბაზში თავს არ ზოგავთ და თქვენს საქმეს ღირსეულად ასრულებთ, კუნთების ტკივილი, შესაძლოა, თქვენი ცხოვრების განუყოფელ ნაწილადაც იქცეს. რიგ შემთხვევებში, ტკივილის სიმწვავე თავის მაქსიმუმს აღწევს. თუ მტკივანი კუნთების პრობლემა ხშირად გაწუხებთ, აღნიშნულ მოვლენას პოზიტიურად უნდა მიუდგეთ. ტკივილი იმის მანიშნებელია, რომ თქვენ დასახული მიზნისკენ წარმატებით მიდიხართ. დარბაზში ათლეტები ერთმანეთთან საუბარს ხშირად მტკივნეულ ფიზიკურ შეგრძნებებზე ყურადღების გამახვილებით იწყებენ. ზოგიერთი მათგანი ფეხის ვარჯიშების შემდგომ მწვავე ტკივილებზე ჩივის, ზოგს კი ზურგის ტკივილი აწუხებს. მათი ნაწილი აღნიშნავს, რომ მძიმე დატვირთვის გამო მთელი ღამე გაათენა, რადგან კუნთების ტკივილი ძალიან აწუხებდა.
დარბაზში მოსულ ათლეტებთან მტკივანი კუნთების შესახებ საუბარი თავმომწონე მონადირის საქციელს ჰგავს, როდესაც ის წარმატებული ნადირობის შემდეგ ნანადირევთან ერთად სამახსოვრო ფოტოს გადაღებას ცდილობს. კუნთის ტკივილი წარმატებულ ათლეტს ისევე ახარებს, როგორც ამერიკული ფეხბურთის მოთამაშეს თაჩდაუნი, ან რაგბისტს - ლელო. როდესაც წონებით ვარჯიშის შემდეგ ათლეტებს კუნთებში უსიამოვნო შეგრძნებები უჩნდებათ, ისინი დატვირთვის ხარისხსს სწორედ ტკივილის დონის მიხედვით განსაზღვრავენ. რაც მეტად აწუხებს ფიტნესით გატაცებულ ადამიანს კუნთის ტკივილი, მით უფრო ამაყად და თავდაჯერებულად გრძნობს ის თავს. კუნთების ტკივილს გამოცდილი ათლეტები ტრაგიკულად არასდროს უყურებენ. როდესაც თქვენ იმაზე მეტი წონებით ვარჯიშობთ, ვიდრე მიჩვეული ხართ, ბუნებრივია, სხეულში უსიამოვნო შეგრძნებები შეგაწუხებთ. ტკივილი მხოლოდ მას შემდეგ გადაივლის, როდესაც ძალების სათანადოდ აღდგენას შეძლებთ.
კუნთების ტკივილი იმაზე მიგანიშნებთ, რომ თქვენი კუნთოვანი მასა მეტად იზრდება, თუმცა ტკივილის შეგრძნება ამის ერთადერთი ინდიკატორი ნამდვილად არ არის. მძიმე წონებით აზიდვების შესრულებისას თქვენი კუნთების ბოჭკოები სისხლით სწრაფად ივსება, რაც მათ დიფერენცირებას იწვევს. როდესაც ეს ხდება, კუნთის შემომსაზღვრელი ფასცია იწელება, პარალელურად ის მინერალებსა და სხვა სასარგებლო ნაერთებს გამოიმუშავებს. აღნიშნული პროცესების გამო კუნთის გარშემომსაზღვრელ სივრცეში მნიშვნელოვანი ძვრები მიდინარეობს და კუნთოვანი ქსოვილების ფუნქცია რადიკალურ ცვლილებებს განიცდის. ტკივილის შეგრძნება კი იმიტომ გეუფლებათ, რომ თქვენი ორგანიზმი კუნთის ნორმალურ მდგომარეობაში დაბრუნებას ცდილობს. კუნთის სრულ აღდგენამდე თქვენ ტკივილის ატანა გიხდებათ და თავისუფლად მოძრაობასაც ვერ ახერხებთ, თუმცა შედეგად კუნთის ბოჭკოები გეზრდებათ და გიძლიერდებათ.
გამოცდილი ათლეტები ვარჯიშის შემდეგ კუნთის ბოჭკოებში მიმდინარე პროცესებს კარგად იცნობენ და შესაბამისად ტკივილს არ უშინდებიან. პირიქით, მათ უსიამოვნო შეგრძნებები აბედნიერებთ კიდეც. მიუხედავად იმისა, რომ ვარჯიშის შემდეგ კუნთის ტკივილი დადებითი მოვლენაა, სიფრთხილის გამოჩენა მაინც გმართებთ, რადგან ის ყოველთვის კუნთოვანი მასის ზრდით და ორგანიზმში მიმდინარე აღდგენითი პროცესებით არ არის გამოწვეული. თუ კუნთს მეტისმეტად დატვირთავთ, შესაძლოა, ის სერიოზულად დააზიანოთ. მსგავს შემთხვევებში კუნთი სასარგებლო ნივთიერებების ათვისებას ვეღარ ახერხებს და სუსტდება. თუ ძალების აღდგენისთვის მეტისმეტად ცოტა დროს გამოყოფთ, კუნთოვანი ქსოვილი რღვევას დაიწყებს. ტკივილი ამ შემთხვევაშიც შეგაწუხებთ, რამაც, შეიძლება, შეცდომაში შეგიყვანოთ.
დეჰიდრატაცია, არაჯანსაღი კვება, მინერალებისა და ამინომჟავების ნაკლებობა თქვენს კუნთებს მნიშვნელოვნად აზიანებს. როდესაც კუნთს სათანადო რაოდენობის სასარგებლო ნივთიერებები არ მიეწოდება, ვარჯიშის შემდეგ მას ძალების აღდგენისთვის ენერგია არ აქვს, რის გამოც კუნთების არეში ტკივილი ხშირად შეგაწუხებთ. თუ სუსტი კუნთები გაქვთ, დატვირთვის შემდეგ უსიამოვნო შეგრძნებები გაგიჩნდებათ, რაც იმის მიმანიშნებელი ნამდვილად არ იქნება, რომ კუნთოვანი მასა გეზრდებათ. ხშირ შემთხვევაში კუნთების ტკივილი ორგანიზმის საერთო მდგომარეობით არის გამოწვეული და მას ვარჯიშთან კავშირი საერთოდ არ აქვს. თუ თქვენ გაცივდით ან ვირუსი შეგეყარათ, შესაძლოა, ცუდად ყოფნის ერთ-ერთი პირველი სიმპტომი სწორედ კუნთების ტკივილი იყოს. სერიოზულ ნერვულ და იმუნურ დარღვევებს კუნთების არეში უსიამოვნო შეგრძნების გამოწვევა შეუძლია. როგორც წესი, მსგავს შემთხვევაში ტკივილი ხანგრძლივია და რამდენიმე კვირის განმავლობაში შეუჩერებლად გრძელდება. თუ გრძნობთ, რომ უსიამოვნო შეგრძნებები დიდი ხნის მანძილზე გაწუხებთ და ის კუნთები გტკივათ, რომელსაც დარბაზში არ ავარჯიშებთ, აუცილებლად მიაკითხეთ მკურნალ ექიმს, რათა ჯანმრთელობის მდგომარეობა გადაიმოწმოთ.
მთავარია, გახსოვდეთ, რომ ტკივილი კუნთოვან ქსოვილსა და ბოჭკოებში მიმდინარე დროებით ან ხანგრძლივ პრობლემურ პროცესებზე მიგანიშნებთ, რომელიც რიგ შემთხვევაში დამოუკიდებლად აღმოიფხვრება, ზოგჯერ კი ექიმის ჩარევა აუცილებელია. თუ კუნთების ტკივილი ვარჯიშით არის გამოწვეული, ზედმეტი აღელვება საჭირო არ არის. მსგავს შემთხვევაში, მთავარია, პასიური ცხოვრების სტილზე არ გადაინაცვლოთ და თქვენი მდგომარეობის შესაფერისი სავარჯიშო რუტინა შეიმუშავოთ. თუ ნამდვილ ათლეტად ჩამოყალიბება გსურთ, ადაპტაციის უნარი უნდა განივითაროთ და ტკივილის პარალელურად ვარჯიში ისწავლოთ. კუნთის ტკივილი ლოკალური და დროებითი მოვლენაა, რომელიც სათანადო ყურადღების გამოვლენის შემთხვევაში, მარტივად დამარცხებადია. სწორად შერჩეული სავარჯიშო რუტინა აღნიშნულ პრობლემასთან ბრძოლაში ძალიან დაგეხმარებათ.
როგორ უნდა ივარჯიშოთ, როდესაც კუნთების ტკივილი გაწუხებთ?
კუნთის სათანადოდ გავარჯიშება თუ გსურთ, მისი სტიმულაცია უნდა სცადოთ და არა - განადგურება. რა თქმა უნდა, მეტისმეტად მსუბუქი ვარჯიშების შესრულება სასურველ შედეგამდე ვერ მიგიყვანთ, მაგრამ ხანგრძლივი ტკივილების ატანა თქვენი ორგანიზმისთვის და კუნთებისთვისაც საზიანოა. თუ წონებით ვარჯიშობთ, არ აქვს მნიშვნელობა გამოცდილი ათლეტი ხართ, თუ დამწყები, ძალების აღდგენისთვის დრო აუცილებლად უნდა გამონახოთ. თუ კუნთების ტკივილი შეგაწუხებთ, თქვენი რეგულარული რუტინის შეცვლაზე უნდა იფიქროთ. მცირედი ცვლილებების განხორციელება არ უნდა გაშინებდეთ. თუ ორშაბათობით ტრადიციულად მკერდის ვარჯიშებს ასრულებთ, განსაკუთრებულ შემთხვევებში მათზე უარის თქმა მიზნის მიღწევაში ხელს არ შეგიშლით. კუნთების ტკივილისგან გასათავისუფლებლად დასვენებას და ძალების აღდგენას ჩვეულებრივზე მეტი დრო უნდა დაუთმოთ. ინტენსიური ვარჯიშისგან თავი რამდენიმე დღის მანძილზე შეიკავეთ, მსგავსი ქცევა არ დაგაზარალებთ.
კუნთების ტკივილს ხშირად მეტისმეტი დატვირთვა იწვევს. თუ თავს ძალიან იტვირთავთ, ეცადეთ შედარებით მსუბუქი ვარჯიშების შესრულებაზე გადახვიდეთ. რთულიდან მარტივ ვარჯიშებზე გადასვლა და შემდგომში დატვირთვის კვლავ გაძლიერება საკმაოდ ეფექტურია და კუნთოვანი მასის ზრდას მნიშვნელოვნად ასტიმულირებს. გამოცდილი ათლეტები კუნთების აგებულებაში საკმაოდ კარგად ერკვევიან. მათ ყოველთვის იციან, რომელი კუნთი აწუხებთ და ტკივილის სავარაუდო მიზეზსაც ხვდებიან. მტკივანი კუნთები ჯანსაღი კუნთისგან განსხვავებულად უნდა ავარჯიშოთ. თუ ბიცეფსი გაწუხებთ, ის სტანდარტული მოძრაობებით აღარ უნდა დატვირთოთ. ჯანსაღი კუნთები შეგიძლიათ ჩვეულებრივ ავარჯიშოთ. განსაკუთრებული ყურადღება მიაქციეთ დატვირთვის ტემპსა და მოძრაობის ინტენსივობას. როდესაც თითოეულ ნაბიჯს აკონტროლებთ და ნელ ტემპში ვარჯიშობთ, კუნთის დამატებით ბოჭკოებს დაზიანებისგან იცავთ. ამასთან, ბალანსირებული ვარჯიში დაზიანებული კუნთების აღდგენის შემდეგ ინტენსიური დატვირთვისთვის მოსამზადებლადაც გეხმარებათ.
კუნთების ტკივილისგან თავდასაღწევად საუკეთესო გზა გაწელვის ვარჯიშების შესრულებაა. აღნიშნული ტიპის მსუბუქი დატვირთვა კუნთის აღდგენას აჩქარებს და ტკივილის შემსუბუქებაშიც გეხმარებათ. მტკივნეული კუნთებისთვის ძალიან სასარგებლოა კონტრასტული აბაზანების მიღებაც. ცივი და ცხელი აბაზანები კუნთის აღდგენას ასტიმულირებს და უსიამოვნო შეგრძნებებისგან გათავისუფლებაში გიწყობთ ხელს. ტკივილისგან გათავისუფლებას ჰიდრატაციის მაღალი ხარისხის მიღწევის გარეშე ვერ შეძლებთ. წყალი არამხოლოდ კუნთოვან უჯრედებს აცოცხლებს, ის კუნთს სასარგებლო ნივთიერებებით, ელექტროლიტებით, ამინომჟავებითა და მინერალებით ამარაგებს. როდესაც ტკივილი ძალიან გაწუხებთ, პროფესიონალური მასაჟის ჩატარება ძალიან მოგიხდებათ. მასაჟის დახმარებით კუნთში სისხლის მიმოქცევა უმჯობესდება, კუნთოვანი ქსოვილი აღდგენას სწრაფად ახერხებს და უსიამოვნო სიმპტომები სწრაფად ქრება. კუნთების ტკივილის პარალელურად თქვენ ვარჯიშის გაგრძელება თამამად შეგიძლიათ. მთავარია, ვარჯიშზე კონცენტრირდეთ და ჯანსაღი კუნთების სათანადოდ გამოყენება შეძლოთ. ვარჯიშის დროს თქვენს სხეულს ყურადღებით დააკვირდით და თქვენს შეგრძნებებს ენდეთ. თუ გრძნობთ, რომ კუნთის ტკივილი დატვირთვაში ხელს გიშლით, ძალების აღდგენას მეტი დრო დაუთმეთ და ინტენსიური ვარჯიშისგან თავი შეიკავეთ.
წარმატებებს გისურვებთ!
