საინტერესო რჩევები ძვლების ჯანმრთელობის შესანარჩუნებლად
ოსტეოპოროზი მსოფლიოში ერთ-ერთი ყველაზე გავრცელებული დაავადებაა, რომელიც ძვლის სტრუქტურის ცვლილებებსა და ძვლოვანი მასის შემცირებას იწვევს. როგორც აღმოჩნდა, აღნიშნული პრობლემა უმეტესად ასაკოვან ქალბატონებს აწუხებთ, თუმცა ოსტეოპოროზისგან არც მამაკაცები არიან დაზღვეულები. 50 წელს გადაცილებული მამრობითი სქესის წარმომადგენლების 38 %-ს ძვლების ჯანმრთელობასთან დაკავშირებული სხვადასხვა სახის პრობლემა აქვს. კვლევებით ასევე დასტურდება, რომ 50 წელს გადაცილებული მამაკაცები ძვლის მოტეხილობას ხშირად იღებენ. როგორც აღმოჩნდა, მამრობითი სქესის წარმომადგენლებში მოტეხილობით გამოწვეული სიკვდილიანობის მაჩვენებელიც საკმაოდ მაღალია. ოსტეოპოროზისა და ძვლის მოტეხილობის გამომწვევი მთავარი მიზეზი ასაკის მატება ნამდვილად არ არის. ადრეულ ასაკში ცხოვრების სტილის შეცვლა ძვლების ჯანმრთელობის შენარჩუნებაში ძალიან დაგეხმარებათ.
- თქვენი საკვები რაციონი კალციუმით გაამდიდრეთ
კალციუმი ძვლებისა და კბილების სტუქტურული სიჯანსაღისთვის სასიცოცხლოდ მნიშვნელოვანია. გარდა ამისა, ის თქვენი ორგანიზმისთვის უამრავი სარგებლის მომტანია. კალციუმი სისხლის შედედებასა და კუნთების შეკუმშვების გაძლიერებას უწყობს ხელს. ადამიანის ორგანიზმი კალციუმს ბუნებრივად არ გამოიმუშავებს. თქვენ აღნიშნულ მინერალს თმებისა და ფრთჩხილების ზრდის პარალელურად კარგავთ. კალციუმი ორგანიზმს საშარდე გზების გავლითაც ტოვებს. აღნიშნული მინერალი ოფლიანობის ან კუჭ-ნაწლავის აქტიური მოქმედების დროსაც იკარგება. ძვლების ჯანმრთელობის შენარჩუნება თუ გსურთ, ყოველდღიურად 1000-1200 მილიგრამი კალციუმი მაინც უნდა მიიღოთ. იდეალურ შემთხვევაში ამ სასიცოცხლოდ მნიშვნელოვანი მინერალის მარაგის შევსება კვებით უნდა მოახერხოთ. გარკვეული ტიპის საკვები პროდუქტები კალციუმით საკმაოდ მდიდარია. მისი მარაგის შესავსებად ხშირად მიირთვით რძის პროდუქტები, ორაგული. სარდინები, მწვანე ფოთლოვანი ბოსტნეული. ძვლების ჯანმრთელობისთვის ძალიან სასარგებლოა კომბოსტოს, ბროკოლისა და კალეს მირთმევა. კალციუმის დამატებით წყაროებს თუ ეძებთ, შეგიძლიათ, მინერალებით გამდიდრებული შვრია, ფორთოხლის წვენი და სოიოს რძეც ხშირად მიირთვათ.
- აუცილებლად მიიღეთ D ვიტამინი
D ვიტამინი, კალციუმის მსგავსად, ძვლების ჯანმრთელობისთვის სასიცოცხლოდ მნიშვნელოვანია. მისი დახმარებით ორგანიზმი კალციუმის სრულფასოვნად ათვისებას ახერხებს. D ვიტამინის დეფიციტის დროს კალციუმი თავის ფუნქციას ვეღარ ასრულებს და თქვენი ძვლების მდგომარეობაც საგრძნობლად უარესდება. კალციუმის მსგავსად, D ვიტამინის საკვების სახით მიღებაც შეგიძლიათ. უპირატესობა ცხიმიან თევზს მიანიჭეთ. ამ მხრივ განსაკუთრებით სასარგებლოა თინუსი და ორაგული. თუ თევზს არ მიირთმევთ, შეგიძლიათ D ვიტამინით ხელოვნურად გამდიდრებული საკვები პროდუქტები შეიძინოთ. D ვიტამინის საუკეთესო წყაროს მზე წარმოადგენს. ულტრაიისფერი გამოსხივების მიღების შემდეგ თქვენი კანი D ვიტამინის წარმოებას იწყებს. თუმცა გამოსხივებისა და D ვიტამინის სინთეზის ურთიერთკავშირზე უამრავი გარეშე ფაქტორი ახდენს ზეგავლენას, მაგ. ასაკი, კანის ფერი, ღრუბლიანობა ან მზისგან დამცავი კრემი. კვლევებით დგინდება, რომ 70 წლის ასაკის ადამიანის კანი მზის სხივების დახმარებით 25 წლის ადამიანის კანთან შედარებით გაცილებით ნაკლებ D ვიტამინს გამოიმუშავებს. ზამთარში მზიანი დღეების სიმწირის გამო ადამიანებს D ვიტამინის დეფიციტი ხშირად აწუხებთ. მიუხედავად იმისა, რომ მზე ადამიანის ორგანიზმისთვის ძალიან სასარგებლოა, მზის გულზე მეტისმეტად დიდხანს ყოფნას კანის სიმსივნის გამოწვევა შეუძლია, რის გამოც სიფრთხილის გამოჩენა გმართებთ. მედიკოსები გირჩევენ, რომ სახესა და კიდურებზე მზის სხივების მოხვედრა ყოველდღიურად სცადოთ.
- მიირთვით დიდი რაოდენობით შავი ქლიავის ჩირი
კვლევებით დასტურდება, რომ შავი ქლიავის ჩირს ძვლების გაჯანსაღების საოცარი უნარი აქვს. 2011 წელს ჩატარებულმა ერთ-ერთმა კვლევამ აჩვენა, რომ ადამიანებს, რომლებიც ყოველდღიურად მიირთმევდნენ შავი ქლიავის ჩირს (დღეში სულ მცირე 9 ცალს), ძვლებში მინერალების გაცილებით მაღალი შემცველობა უფიქსირდებოდათ, იმ ადამიანებთან შედარებით, რომლებიც უპირატესობას ვაშლს ანიჭებდნენ. შავი ქლიავის ჩირის დახმარებით ძვლის რეზორბციის ფაზა (ძვლოვანი მასის შემცირება) მნიშვნელოვნად სუსტდება. გარდა ამისა, შავი ქლიავის ჩირს ძვლის სტრუქტურის გაუმჯობესების უნარიც შესწევს.
- რეგულარულად ივარჯიშეთ
რეგულარულ ვარჯიშს თქვენი ორგანიზმისთვის უამრავი სარგებლის მოტანა შეუძლია. ძვლების ჯანმრთელობის შენარჩუნებაზე თუ ზრუნავთ, გარკვეული სახის ვარჯიშებზე უარის თქმა მოგიხდებათ. ნებისმიერი ვარჯიში, რომელიც ფეხების დატვირთვას ზრდის, თქვენი ძვლებისთვის სასარგებლოა. უპირატესობა მიანიჭეთ სეირნობას, სირბილს, ძუნძულს და თხილამურებით სრიალს. ცურვა, რომელიც გულ-სისხლძარღვთა სისტემის გაძლიერებისთვის ერთ-ერთი საუკეთესო დატვირთვაა, ძვლების გაჯანსაღებაში დიდ დახმარებას ვერ გაგიწევთ. რატომ არის ვარჯიში ძვლების ჯანმრთელობისთვის სასარგებლო? ძვალი ცოცხალი ქსოვილია, რომელიც ყოველდღიურად იცვლება. ზოგიერთი უჯრედი ძვალს კალციუმით ამარაგებს, ზოგიერთი კი მას მინერალებს აცლის. ვარჯიშის დროს ძვლებზე ზეწოლა ძლიერდება, რის გამოც კალციუმით მათი მომარაგების პროცესი ჩქარდება, რაც საბოლოოდ ძვლების ზრდას და გაძლიერებას იწვევს.
- უარი თქვით მოწევაზე
მეცნიერები ერთხმად აღიარებენ, რომ მოწევა ძვლების ჯანმრთელობაზე ნეგატიურად ზემოქმედებს. კვლევებით დასტურდება, რომ სიგარეტი ძვლის სტრუქტურას მნიშვნელოვნად აზიანებს. მოწევა ძვლისკენ სისხლის გადაადგილებას აფერხებს და ძვლის მიერ კალციუმის ათვისების უნარს აქვეითებს. ნიკოტინი ძვლოვანი მასის შემცირებას უწყობს ხელს. მოწევა ესტროგენის დაშლის პროცესზეც ახდენს ზეგავლენს, რაც, თავის მხრივ, ძვლის სტრუქტურის ნეგატიური ცვლილებების გამომწვევ მიზეზად იქცევა. უახლესი კვლევებით დგინდება, რომ მოწევა ძვლის რეზორბციის პროცესში ჩართული ცილების გამომუშავების პროცესს ასტიმულირებს, რითაც ძვლოვანი მასის შემცირებას უწყობს ხელს. როგორც წესი, მწეველები ალკოჰოლისადმი მაღალ მიდრეკილებას ავლენენ, ისინი ცუდად იკვებებიან და წონის დეფიციტიც ხშირად აწუხებთ, ეს ყოველივე კი ძვლების ჯანმრთელობაზე ნეგატიურად ზემოქმედებს.
- ალკოჰოლი ზომიერი რაოდენობით მიიღეთ
კვლევებით დასტურდება, რომ ალკოჰოლის მიღება გულ-სისხლძარღვთა სისტემის ფუნქციონირებას აუმჯობესებს. თუმცა თუ ალკოჰოლს დიდი რაოდენობით იღებთ, ის თქვენს ჯანმრთელობას უფრო მეტ ზიანს მოუტანს, ვიდრე სარგებელს. ალკოჰოლი ძვლების ჯანმრთელობისთვისაც სასარგებლოა, თუმცა მისი ხშირად მიღება რეკომენდებული არ არის. კვლევებით დგინდება, რომ მამაკაცებს და ქალბატონებს, რომლებიც ალკოჰოლს ზომიერად მიირთმევენ, ძლიერი ძვლოვანი სისტემა აქვთ. მათი ძვლები მინერალებით საკმაოდ მდიდარია. ადამიანებს კი, რომლებიც ალკოჰოლს საერთოდ არ იღებენ, გაცილებით სუსტი ძვლები აქვთ. დიდი რაოდენობით ალკოჰოლის მიღება ძვლების ჯანმრთელობაზე ნეგატიურად აისახება. თუ თქვენ ხშირად სვამთ, მოტეხილობების მიღების შემთხვევაში ძვლების მთლიანობის აღდგენა ძალიან გაგიჭირდებათ. ღვინის მოყვარულებს თავისუფლად შეუძლიათ დღის განმავლობაში 1 ან 2 ჭიქა ღვინო მიირთვან, უფრო დიდი დოზით ალკოჰოლის მიღება კი მათ ჯანმრთელობაზე ნეგატიურად აისახება.
- კერძებში ნაკლები მარილი გამოიყენეთ
კერძების მომზადებისას დიდი რაოდენობით მარილის გამოყენებამ, შესაძლოა, მაღალი არტერიული წნევა, აუტოიმუნური დაავადებების განვითარება და ძვლოვანი მასის დანაკარგი გამოიწვიოს. მარილი საშარდე გზების გავლით კაცლიუმის ორგანიზმიდან გამოდევნას უწყობს ხელს, რის გამოც ძვლის მასა მცირდება. თუ თქვენ უპირატესობას მარილიან კერძებს ანიჭებთ, კალციუმის დანამატის სახით მიღება აუცილებლად დაგჭირდებათ. კვლევებით ასევე დასტურდება, რომ მარილიანი კერძებით რეგულარულად კვება ძვლის მდგრადობას ამცირებს და მოტეხილობების მიღების რისკს მნიშვნელოვნად ზრდის.
ძილის მოუწესრიგებელი რეჟიმი ძვლის ჯანმრთელობაზე უდიდეს გავლენას ახდენს. თუ უძილობა გაწუხებთ, აღნიშნული პრობლემის მოგვარებაზე აუცილებლად უნდა იზრუნოთ. წინააღმდეგ შემთხვევაში ძვლების ჯანმრთელობის შენარჩუნება გაგიჭირდებათ. თუ ჯანმრთელობის პრობლემები გაქვთ და მედიკამენტებს რეგულარულად იღებთ, შესაძლოა, ძვლის სტრუქტურა დაგიზიანდეთ. აუცილებლად მოიძიეთ ინფორმაცია თქვენ მიერ მიღებული მედიკამენტების გვერდითი ეფექტების შესახებ. თუ აღმოაჩენთ, რომ რომელიმე მათგანს ძვლების ჯანმრთელობის დაზიანება შეუძლია, დახმარებისთვის მკურნალ ექიმს მიმართეთ. ის შესაბამის რეკომენდაციებს მოგცემთ და პრობლემის მოგვარების ეფექტურ გზებს შემოგთავაზებთ.
წარმატებებს გისურვებთ!
