როგორ მოვიშოროთ ღიპი 10 დღეში?
ადამიანების უდიდეს ნაწილს ღიპის 10 დღეში მოშორება წარმოუდგენელ პერსპექტივად მიაჩნია. მართალია, დაუჯერებლად ჟღერს, მაგრამ მუცლის ცხიმის წარმატებით დაწვა ერთ კვირასა და სამ დღეში ნამდვილად შესაძლებელია. წარმატების გასაღები დეტალებშია. ის რაც ერთი შეხედვით წვრილმანად გეჩვენებათ, სინამდვილეში ძალიან მნიშვნელოვანი შეიძლება იყოს, რის გამოც დეტალებს ყურადღებით უნდა მოეკიდოთ. როდესაც ზედმეტი ცხიმებისგან გათავისუფლებას ცდილობთ, მთელი რიგი საკითხებისადმი პედანტური დამოკიდებულების გამოვლენა მოგეთხოვებათ. მთავარია, მიზნის მიღწევა ზედმეტი სტრესის და უსიამოვნების გარეშე შეძლოთ. ჩვენ მიერ შემოთავაზებული რჩევები ღიპისგან სწრაფად გათავისუფლებაში დაგეხმარებათ, თუმცა მიღებული შედეგის ხანგრძლივად შენარჩუნებაზე სამომავლოდ თავად უნდა იზრუნოთ.
- ძილის რეჟიმი მოიწესრიგეთ
უძილობა და გადაღლილობა ხშირად ზედმეტი ცხიმების დაგროვებას იწვევს. ძილის ნაკლებობა მეტაბოლიზმზე ნეგატიურ ზეგავლენას ახდენს, რის გამოც ჯანსაღი წონის შენარჩუნება ძალიან რთულდება. ცხიმოვანი უჯრედები ჰორმონ ლეპტინს გამოიმუშავებენ. აღნიშნული ჰორმონი ტვინს ორგანიზმში ენერგიის მარაგის შესახებ ინფორმაციას რეგულარულად აწვდის. ლეპტინის გამომუშავების პროცესი ყველაზე მეტად ღამის საათებში, ძილის დროს აქტიურდება. თუ თქვენ ღამით სათანადოდ არ გამოიძინებთ, ორგანიზმში აღნიშნული ჰორმონის დონე მნიშვნელოვნად დაქვეითდება. ტვინი ენერგიის მარაგის შესახებ ინფორმაციის მიღებას ვერ ახერხებს, რის გამოც თქვენი ორგანიზმი ცხიმის მარაგის შევსებას იწყებს, ცხიმის წვის პროცესი კი მნიშვნელოვნად ნელდება. ძილის რეჟიმის მოწესრიგებას წონაში კლებისთვის ფუნდამენტური მნიშვნელობა აქვს. სრულფასოვანი გამოძინება ენერგიას შეგმატებთ და ნახშირწყლებზე თქვენს მოთხოვნილებას მნიშვნელოვნად შეამცირებს. უძილობა ზრდის ჰორმონის გამომუშავებასაც აფერხებს, რის გამოც, ძილის ნაკლებობის დროს, კუნთოვანი მასის მატება რთულდება. ზრდის ჰორმონის 70 %-ზე მეტი ადამიანის ორგანიზმში სწორედ ძილის დროს გამომუშავდება. თუ დღე-ღამეში 7 საათი მაინც არ გძინავთ, მხოლოდ ვარჯიშის დახმარებით კუნთოვანი მასის სრულფასოვან ზრდას ვერ უზრუნველყოფთ.
- დიდი რაოდენობით ცილები მიიღეთ
კუნთოვანი ქსოვილის ერთ-ერთი უმთავრესი კომპონენტი ცილაა. როდესაც კუნთის ზრდაზე ხართ ორიენტირებული, მიღებული ცილების რაოდენობას სათანადო ყურადღება უნდა მიაქციოთ. როდესაც მუცლის ცხიმების დაწვას ცდილობთ, ყოველდღიურად თქვენი სხეულის მასის ყოველ ნახევარ კილოგრამზე 1,5 გრამი ცილა უნდა მიიღოთ. ცილოვანი პროდუქტი ყოველი კვების დროს უნდა მიირთვათ. ცილის დახმარებით ორგანიზმს ამინომჟავებით მოამარაგებთ და სისხლში შაქრის დონის დაბალანსებასაც შეძლებთ. ნორმალურ ვითარებაში სხეულის მასის ყოველ ნახევარ კილოგრამზე 1 გრამი ცილის მიღებაც საკმარისია. ვარჯიშის შემდეგ ცილოვანი პროდუქტის მირთმევა აუცილებელია.
- ნახშირწყლებისადმი დამოკიდებულება შეცვალეთ
სავარაუდოდ, არაერთხელ გსმენიათ, რომ წონაში კლების მსურველების უმთავრეს მტრად ნახშირწყალი მიიჩნევა. ნახშირწყლების რაციონიდან სრულად გამორიცხვა წონაში სწრაფად კლებას ხელს ნამდვილად უწყობს, თუმცა მსგავს შემთხვევაში თქვენ თავს დასუსტებულად, უენერგიოდ და გაღიზიანებულად იგრძნობთ. ტვინის ნორმალური ფუნქციონირებისთვის ნახშირწყლების რეგულარული მიღება აუცილებელია. ნახშირწყლები ძალიან დიდ ზეგავლენას ახდენს ცენტრალური ნერვული სისტემის გამართულ მუშაობაზეც. წონაში კლება თუ გსურთ, ნახშირწყლების სწორად გამოყენება უნდა ისწავლოთ. მათი რაციონიდან სრულად გამორიცხვა კი აუცილებელი სულაც არ არის. თუ ნახშირწყლებს საუზმეზე და ვარჯიშის შემდეგ ნორმალური დოზებით მიიღებთ, წონაში დაკლებას თავისუფლად შეძლებთ, ამასთან არც ენერგიის ნაკლებობა და ძილიანობა შეგაწუხებთ.
- 9 დღის განმავლობაში წონებით ივარჯიშეთ
ადამიანების უდიდესი ნაწილი თვლის, რომ იდეალური მუცლის კუნთების დაყენებისთვის კარდიოს შესრულება ძალიან მნიშვნელოვანია. დამწყები ათლეტების უმრავლესობა ვერ აცნობიერებს, რომ წონაში კლებისთვის წონებით ვარჯიშიც ძალიან სასარგებლო და ეფექტური დატვირთვაა. თუ მუცლის ცხიმების დაწვაზე ხართ ორიენტირებული, წონაში კლების 10 დღიანი რუტინიდან 9 დღე სიმძიმეებით ვარჯიშს უნდა დაუთმოთ. ინტერვალური ვარჯიშებით დილის საათებში უნდა დაკავდეთ. საღამოს კი ძალოვანი ვარჯიშების შესრულებას გირჩევთ. წონების გამოყენებით ყოველდღიურად სხვადასხვა ზონა უნდა გაავარჯიშოთ. პირველი დღე ფეხის ვარჯიშებს დაუთმეთ, მეორე დღეს მკერდი გაავარჯიშეთ, მესამე საღამოს ზურგი დატვირთეთ, მეოთხე დღე მხრებისთვის გამოყავით, მეხუთე კი- მკლავებისთვის. მეექვსე დღეს მცირე შესვენება მოიწყვეთ. მეშვიდე დღიდან ვარჯიში განაახლეთ და კვლავ ფეხები დატვირთეთ, მერვე დღეს მკერდი გაავარჯიშეთ, მეცხრე დღე მხრებს მიუძღვენით, მეათე დღეს კი მკლავების ვარჯიშებით დაკავდით.
- 7 დღის განმავლობაში ინტერვალური ვარჯიშები შეასრულეთ
ცხიმის დაწვა თუ გსურთ, ინტერვალური ვარჯიშების შესრულების გარეშე მიზნის მიღწევა გაგიჭირდებათ. აღნიშნული ტიპის დატვირთვას საკმაოდ ცოტა დრო სჭირდება, ამასთან მას თქვენი გარეგნობის რადიკალურად შეცვლის უნარი აქვს. ინტენსიური დატვირთვის ინტერვალებისა და ხანმოკლე შესვენებების კომბინაცია ცხიმების ეფექტურად დაწვაში ძალიან გეხმარებათ. ინტერვალური ვარჯიშების მთავარი უპირატესობა იმაში მდგომარეობს, რომ თქვენი ორგანიზმი ცხიმის წვას დატვირთვის დასრულების შემდეგაც წარმატებით განაგრძნობს. დარბაზის დატოვებიდან რამდენიმე საათის მანძილზე მეტაბოლიზმი გააქტიურებულია, რაც წონაში კლების პროცესს აჩქარებს. ინტერვალური ვარჯიშები დილის საათებში უზმოზე უნდა შეასრულოთ. პირველი ორი დღე ვარჯიშს დაუთმეთ, მესამე დღეს შეისვენეთ. მეოთხე-მეხუთე დღეს კვლავ ივარჯიშეთ, მეექვსე დღე დასვენებისთვის გამოიყენეთ (შეგიძლიათ, 60 წუთი ფეხით სეირნობას ან ძუნძულს დაუთმოთ), მეშვიდე-მერვე დღეს ივარჯიშეთ, მეცხრე დღეს შეისვენეთ და მეათე დღეს კვლავ ინტერვალური ვარჯიშებით დაკავდით.
- ხშირად დაკავდით სექსით
ტესტოსტერონი ერთ-ერთი უმნიშვნელოვანესი ჰორმონია, რომელიც წონებით ვარჯიშის შემდეგ კუნთოვანი მასის ზრდას და ძალების სწრაფად აღდგენას უწყობს ხელს. ძალების აღდგენასა და კუნთის ზრდაზე ზრდის ჰორმონსა და ქორიონიკული გონადოტროფინის კონცენტრაციის დონეც ზემოქმედებს. აღნიშნული ჰორმონების მაღალი კონცენტრაციის მისაღწევად სრულფასოვანი ძილი, ჯანსაღი კვება და რეგულარული ვარჯიში აუცილებელია. ყოველდღიური სტრესი კატაბოლური ჰორმონების (მაგ.კორტიზოლი) გამომუშავების პროცესს ასტიმულირებს. აღნიშნული ტიპის ჰორმონები კუნთოვანი მასის დანაკარგს იწვევს და წონაში კლების პროცესს მნიშვნელოვნად აფერხებს. ტესტოსტერონის მატებაზე თუ ხართ ორიენტირებული, ჯანსაღი კვების, სრულფასოვანი ძილის და ვარჯიშის გარდა რეგულარული სექსიც აუცილებლად გჭირდებათ. სექსუალური ცხოვრების გაუმჯობესება მუცლიდან ზედმეტი ცხიმების მოშორებაში ძალიან დაგეხმარებათ და განწყობასაც აგიმაღლებთ.
- მიიღეთ წონაში კლებისთვის სასარგებლო დანამატები
მუცლის ცხიმების წვისა და წონაში კლებისთვის საიდუმლო ელექსირის ან ჯადოსნური აბის ძიებას არ გირჩევთ . უმჯობესია, თუ მიზნის მიღწევისთვის ყველაზე ოპტიმალურ გზებს მიმართავთ. ვარჯიშის დაწყებამდე 200 მგ. კოფეინის შემცველი დანამატის მიღება არაფერს გავნებთ. ვარჯიშის შემდგომ და დილის საათებში კი 2-2 გრამი ბეტა ალანინის მიღებაც შეგიძლიათ. 2008 წელს ფეხბურთელებზე ჩატარებულმა 30 დღიანმა კვლევამ აჩვენა, რომ სპორტსმენები, რომლებიც აღნიშნულ ამინომჟავას რეგულარულად იღებდნენ, ვარჯიშის შემდეგ თავს გაცილებით მხნედ და ენერგიულად გრძნობდნენ. მათ თავბრუსხვევის ან სისუსტის შეგრძნებები არასდროს აწუხებდათ. ხოლო ის ფეხბურთელები, რომლებიც ბეტა ალანინს არ იღებდნენ, დაღლილობას და თავბრუსხვევას ხშირად უჩიოდნენ. კვლევებით ასევე დადასტურდა, რომ კოფეინის შემცველი დანამატები წონებით მოვარჯიშე ათლეტების შესრულების ხარისხს 11,2 %-ით აუმჯობესებდა. წონაში დაკლება და მუცლის ცხიმებისგან გათავისუფლება თუ გსურთ, ვარჯიშით მიღებული სარგებლის გაზრდაზე აუცილებლად უნდა იფიქროთ. უსაფრთხო დანამატების მიღება დარბაზში შესრულების ხარისხის გაუმჯობესებაში დაგეხმარებათ, ამასთან, დატვირთვის შემდგომ დაღლილობისა და სისუსტის შეგრძნებისგან გათავისუფლებასაც შეძლებთ.
გაითვალისწინეთ, რომ ჩვენ მიერ შემოთავაზებული რჩევები მხოლოდ ხანმოკლე ვადით უნდა გამოიყენოთ. აღნიშნულ რეჟიმში ცხოვრება მხოლოდ ექსტრემალურ ვითარებაშია მისაღები. ღიპისგან გათავისუფლების შემდეგ კი ცხოვრების ნორმალურ რიტმს უნდა დაუბრუნდეთ.
წარმატებებს გისურვებთ!
