როგორ დავამარცხოთ შფოთვითი აშლილობა - ფრენკ ლიპმანის რჩევები
შფოთვითი აშლილობა გენერალიზირებული შფოთვის მდგომარეობაა, რომელიც უსიამოვნო ფიზიკური და ფსიქიკური სიმპტომატიკით ხასიათდება. ადამიანებს, რომლებსაც შფოთვითი აშლილობის დიაგნოზს უსვამენ, კონცენტრაციის უუნარობის, უძილობის, შიშის, მოუსვენრობის და დაძაბულობის შეგრძნება პერმანენტულად აწუხებთ. გენერალიზირებული შფოთვა თანამედროვე ადამიანებისთვის ერთ-ერთ ყველაზე მტანჯველ და რთულად დასაძლევ გამოწვევად რჩება. იმის გამო, რომ ადამიანების დიდ ნაწილს შფოთვასთან გამკლავება ძალიან უჭირს, მათი უმრავლესობა განგაშს და შიშს საკმაოდ არაეფექტური საშუალებებით ებრძვის. ალკოჰოლი და სპეციალური ტიპის მედიკამენტები შფოთვით აშლილობას მხოლოდ დროებით ამარცხებს, საბოლოო ჯამში, კი მდგომარეობას ძალიან ართულებს.
ალკოჰოლი და ანტიდეპრესანტები (რომელიც შფოთვითი აშლილობის პრობლემის მქონე ადამიანებში პოპულარულია), ორგანიზმზე ნეგატიურად მოქმედებს. თუ მედიკამენტებს და ალკოჰოლს მიეჯაჭვებით, მათ გარეშე ცხოვრება გაგიჭირდებათ, რაც სერიოზული დამოკიდებულების გამომწვევ მიზეზად იქცევა. მთავარია, გახსოვდეთ, რომ შფოთვით აშლილობასთან ბრძოლა გაცილებით უსაფრთხო და ამავდროულად ეფექტური საშუალებებითაც შეგიძლიათ. რა უნდა გააკეთოთ იმისთვის, რომ განუწყვეტელი განგაშისა და შიშის მდგომარეობას თავი დააღწიოთ? ამ კითხვით პროფესორ ფრენკ ლიპმანს მივმართეთ. ექიმი ფრენკ ლიპმანი ცნობილ ვარსკვლავებთან მუშაობს. ის არაერთი ბესტსელერის ავტორია და მკითხველს თავისი ორიგინალური მოსაზრებებით ხშირად აოცებს. ჩვენს სტატიაში მის საინტერესო რჩევებს შემოგთავაზებთ, რომელთა დახმარებით ფსიქიკური ჯანმრთელობის მდგომარეობის გაუმჯობესებას და ცხოვრების ნორმალურ რეჟიმში დაბრუნებას შეძლებთ.
- ალკოჰოლს ხელი არ ახლოთ
ბევრი ადამიანი შფოთვასთან გამკლავების ერთადერთ გზად სწორედ ალკოჰოლს მიიჩნევს, რაც, ერთი შეხედვით, საკმაოდ ლოგიკური შეხედულებაა. ალკოჰოლი ორგანიზმს მოდუნების საშუალებას აძლევს და დაძაბულობას ამცირებს. მიუხედავად ამისა, როდესაც მის ზემოქმედებას თავს აღწევთ, ამჩნევთ, რომ სისხლში შაქრის მოცულობა მნიშვნელოვნად არის მომატებული. თქვენ უსიამოვნო ფიზიკური შეგრძნებები გაწუხებთ და განწყობა ხშირად გეცვლებათ. ორგანიზმი იმაზე მეტ სტრესს განიცდის, ვიდრე ოდესმე და შიშის გრძნობა გეუფლებათ. შესაძლოა, ალკოჰოლის დახმარებით ეიფორიის შეგრძნება დროებით გაქრეს, თუმცა თქვენ დეპრესიულ განწყობაზე დადგებით, რაც ფსიქიკური ჯანმრთელობისთვის არანაკლებ საშიში გამოწვევაა, ვიდრე შფოთვა. ყოველთვის, როდესაც შფოთვის დასაძლევად ალკოჰოლის მიღებას გადაწყვეტთ, გაიხსენეთ, რომ ეს არასწორი გადაწყვეტილებაა. უპირატესობა ისეთ სასმელს მიანიჭეთ, რომელიც ღამით მშვიდად დაძინებაში დაგეხმარებათ და თქვენს განწყობაზე ნეგატიურ ზეგავლენას არ მოახდენს. შფოთვითი აშლილობის მქონე ადამიანებისთვის ძალიან სასარგებლოა ნუშის რძე (დამატკბობლების გარეშე). ის დიდი რაოდენობით მაგნიუმს შეიცავს, რომელიც ორგანიზმზე დამამშვიდებლად მოქმედებს. შეგიძლიათ, საღამოობით უკოფეინო მწვანე ჩაიც მიირთვათ, რომლის შემადგენლობაში ნერვული სისტემის დამამშვიდებელი ამინომჟავა თეანინი გვხვდება. თქვენთვის ძალიან სასარგებლოა გვირილის ჩაიც, რომელიც დამამშვიდებელ ნივთიერებას, გლიცინს შეიცავს.
- უარი თქვით სტიმულატორებზე
ბევრ ყავას მიირთმევთ? თუ ასე იქცევით, ძალიან დიდ შეცდომას უშვებთ, რადგან კოფეინი თქვენს მდგომარეობას უფრო ამძიმებს, ამიტომ მასზე უარის თქმა მოგიწევთ. ყავის ერთ-ერთი მთავარი გვერდითი მოვლენა ის არის, რომ მისი მიღების დროს ორგანიზმში სეროტონინის გამომუშავება ფერხდება, რაც თქვენს განწყობაზე ნეგატიურად აისახება. ყავა გაღიზიანების და შფოთვის შეგრძნებას აძლიერებს, რაც ორგანიზმის საერთო მდგომარეობას ამძიმებს. ნებისმიერი სტიმულატორი, რომელსაც გარკვეული ნივთიერების სახით იღებთ, თქვენი რაციონიდან უნდა გამორიცხოთ, რათა გონების დამშვიდება და განწყობის გამოკეთება შეძლოთ. თუ შფოთვა პერმანენტულად გაწუხებთ და ყავის მიღებაზე უარის თქმას გადაწყვეტთ, ეს ფრთხილად უნდა გააკეთოთ. რამდენიმე კვირის განმავლობაში კოფეინი თქვენი რაციონიდან სრულად უნდა გამოირიცხოს, რაც თანმიმდევრულად და მშვიდად უნდა გააკეთოთ. თუ ყავის მიღებაზე უარს დაუფიქრებლად იტყვით, თავის ტკივილები და დაღლილობა შეგაწუხებთ. ამიტომ აუცილებელია, რომ თქვენი ორგანიზმი ცვლილებებისთვის მოამზადოთ და ყოველდღიურად მიღებული ყავის დოზები ნელ-ნელა შეამციროთ. ყავა ერთადერთი სტიმულატორი არ არის, რომელიც თქვენს ემოციურ აღგზნებას და გაღიზიანებას იწვევს. შფოთვითი აშლილობა თუ გაქვთ, უარი თქვით ტკბილ გაზიან სასმელებზე, შაქრის შემცველ ხილის წვენებზე, ენერგეტიკულ და სპორტულ სასმელებზე. ნებისმიერ შემთხვევაში საუკეთესო არჩევანი წყალია, რომელიც არამხოლოდ ჯანმრთელობისთვის არის სასარგებლო, არამედ განწყობის ამაღლებაშიც გეხმარებათ. დეჰიდრატაცია დეპრესიული სიმპტომების გამომწვევი ერთ-ერთი მთავარი მიზეზია.
- შეკვეცეთ მიღებული ნახშირწყლების დოზები
აუცილებელია, გააცნობიეროთ, რომ კვების რაციონი თქვენს ემოციურ მდგომარეობაზე უდიდეს ზეგავლენას ახდენს. არსებობს სასმელი და საკვები, რომლებიც თქვენს შფოთვას ამცირებს, თუმცა გარკვეული ტიპის პროდუქტები შფოთვის გაძლიერებას უწყობს ხელს. მსგავსი ტიპის საკვები ძალიან მიმზიდველია და ძლიერ მიჯაჭვულობას იწვევს, თუმცა თუ მასზე დამოკიდებული გახდებით, სამომავლოდ, შესაძლოა, დემენციის დიაგნოზიც კი დაგისვან, რაც, რა თქმა უნდა, ნებისმიერი ადამიანისთვის არასასურველი შედეგია. იმის ნაცვლად, რომ შაქრის შემცველ ტკბილ პროდუქტებს მიეჯაჭვოთ, გირჩევთ უპირატესობა მცენარეულ ადაპტოგენებს მიანიჭოთ. მათი დახმარებით ჰორმონებისა და ნეიროტრანსმიტერების დონეს დააბალანსებთ, რაც საბოლოო ჯამში შფოთვით აშლილობასთან გამკლავებაში დაგეხმარებათ. ისეთი ადაპტოგენები, როგორებიცაა აშვაგანდა, ძირტკბილა და რეიში, ნერვული სისტემის დასამშვიდებლად საუკუნეების მანძილზე გამოიყენებოდა. შეგიძლიათ შფოთვის შესამცირებლად დანამატის სახით მაგნიუმი ან თეანინიც მიიღოთ.
- მედიტაცია საუკეთესო არჩევანია
შფოთვის დროს და მაშინაც, როდესაც თავს მშვიდად გრძნობთ, მედიტაცია საუკეთესო არჩევანია. თუ შფოთვასთან გამკლავება გსურთ, მაგრამ ბევრი თავისუფალი დრო არ გაქვთ, აღნიშნული უსაფრთხო მეთოდი პრობლემის მოგვარებაში ყველაზე ეფექტურად დაგეხმარებათ. აუცილებელი არ არის, რომ მედიტაციის ექსპერტი იყოთ. შეგიძლიათ, მარტივი აპლიკაცია გადმოწეროთ ან ინტერნეტში ვიდეორგოლებს უყუროთ, რათა მედიტაციის ელემენტარული წესების დაუფლება შეძლოთ. როდესაც გამოცდილებას და ცოდნას შეიძენთ, მედიტაცაციით რეგულარულად დაკავდით. მისგან სარგებლის მიღება რომ შეძლოთ, ყოველ ჯერზე 10-20 წუთი (მეტი საჭირო არ არის) მედიტაციას დაუთმეთ.
- შფოთვასთან გამკლავებაში სიცილის იოგაც დაგეხმარებათ
ყველასთვის ცნობილია, რომ ვარჯიში შფოთვასთან გამკლავებისთვის ერთ-ერთი საუკეთესო გზაა. ის ორგანიზმის ჯანმრთელობის მდგომარეობას მნიშვნელოვნად აუმჯობესებს. თუ სამსახურში ძალიან იღლებით და დარბაზში დატვირთვა გეზარებათ, განწყობის გაუმჯობესებისთვის სიცილის იოგას კლასს მიაკითხეთ. სიცილის იოგას დახმარებით თქვენს ორგანიზმში დიდი რაოდენობით ენდორფინი გამომუშავდება, რაც სტრესისგან გათავისუფლებაში ძალიან დაგეხმარებათ. გარდა ამისა, თქვენ ძალიან ბევრს იცინებთ, რაც სახალისო და საინტერესოა. თუ სიცილის იოგა ნაკლებად გხიბლავთ და მსგავსი აქტივობები არ გიზიდავთ, უპირატესობა სტანდარტულ ფიზიკურ დატვირთვას მიანიჭეთ. ვარჯიში ღამის ძილს მოგიწესრიგებთ და დღის განმავლობაში სტრესისგანაც დაგიცავთ. აუცილებელი არ არის, რომ ყოველდღიურად კილომეტრები გაირბინოთ, რათა სასურველი შედეგი მიიღოთ. დღის განმავლობაში რამდენიმე წუთი გამოყავით, მარტივი მოძრაობები შეასრულეთ და განიტვირთეთ. მალე თავად დარწმუნდებით, რომ თქვენი განწყობა მნიშვნელოვნად უმჯობესდება და სტრესისგან გათავისუფლებას წარმატებით ახერხებთ.
- საჭმლის მომნელებელი სისტემა მოიწესრიგეთ
ნაწლავებს ხშირად მეორე ტვინადაც მოიხსენიებენ. გარდა იმისა, რომ ნაწლავები მიღებული საკვების მონელებაში გეხმარებათ, ის თქვენს ფიქრებსა და ემოციებზე უდიდეს ზეგავლენას ახდენს, თუმცა ამის შესახებ ადამიანებმა ხშირად არაფერი იციან. თუ მიკრობიომა მოწესრიგებული არ გაქვთ, შფოთვითი აშლილობის განვითარების რისკი საკმაოდ მაღალია, სწორედ ამიტომ, ნაწლავების ჯანმრთელობაზე ზრუნვა ფსიქიკურ ჯანმრთელობაზე ზრუნვის ტოლფასია. როდესაც ჩემთან პაციენტები შფოთვითი აშლილობის დიაგნოზით მოდიან, პირველ რიგში, მათ ნაწლავური ფლორის გამოკვლევას ვურჩევ. როდესაც ჩემი პაციენტები ნაწლავების გამწმენდ სპეციალურ დიეტებს იცავენ და ანტიმიკრობულ მცენარეულ პრეპარატებს იღებენ, მათი განწყობა მნიშვნელოვნად უმჯობესდება.
შფოთვითი აშლილობის დასამარცხებლად მნიშვნელოვანია ძილის რეჟიმის მოწესრიგებაც. სხვაგვარად ნებისმიერი ზემოთ დასახელებული მიდგომა არაეფექტური იქნება. როდესაც ღამის საათებში ძილის მოთხოვნილებას იგრძნობთ, მაშინვე საწოლს მიაშურეთ, რათა სწრაფად დაძინება შეძლოთ. საწოლ ოთახში მობილური ტელეფონები არ შეიტანოთ. აუცილებელია, რომ საძინებელში სიბნელე იყოს, გააკონტროლეთ ოთახში არსებული ტემპერატურაც. საკვები დაძინებამდე რამდენიმე საათით ადრე მიირთვით, რათა ორგანიზმმა მისი გადამუშავება დროულად შეძლოს.
წარმატებებს გისურვებთ!
