10 საუკეთესო ხილი მასის მატებისთვის
კუნთოვანი მასის მატებაზე ფიქრის დროს ადამიანებს ხილი იშვიათად ახსენდებათ. მათმა დიდმა ნაწილმა არ იცის, რომ ხილს ამ მხრივ მნიშვნელოვანი სარგებლის მოტანა შეუძლია. ხილი ძალიან მდიდარია ბეტა-კაროტინებით, E და C ვიტამინებით, ასევე ორგანიზმისთვის სასარგებლო მინერალებით. ჯანსაღი იმუნური სისტემისთვის ანტიოქსიდანტების მიღება აუცილებელია, გარდა ამისა, ხილის შემადგენლობაში შემავალი ბოჭკო საკვების მონელებაში გეხმარებათ. როდესაც კუნთოვანი მასის ზრდაზე ხართ ორიენტირებული, ძალიან დიდი ყურადღებით მოეკიდეთ დროს, როდესაც ხილს მიირთმევთ. უმჯობესია, თუ მას საუზმეზე, ვარჯიშის დაწყებამდე ან მისი დასრულების შემდეგ მიიღებთ.
- ფორთოხალი
ნაცვლად იმისა, რომ აზოტის ოქსიდის დანამატები მიიღოთ, რომელიც ფიტნესით გატაცებულ ადამიანებს ძალიან უყვართ, გირჩევთ ვარჯიშის დაწყებამდე 10 წუთით ადრე ფორთოხალი მიირთვათ. ეს არაჩვეულებრივი ციტრუსი ორგანიზმიდან ტოქსინების გამოდევნაში დაგეხმარებათ. ის ორგანიზმს თავისუფალი რადიკალებისგანაც წმენდს. ფორთოხლის შემადგენლობაში შემავალი C ვიტამინი აზოტის ოქსიდის მარაგის შენარჩუნებაში გეხმარებათ. ეს უკანასკნელი სისხლის მიმოქცევას აუმჯობესებს, გარდა ამისა კუნთების ჟანგბადით მომარაგებას უწყობს ხელს და კუნთოვანი მასის მატებისთვისაც ძალიან სასარგებლოა.
- ალუბალი
ალუბალი ძალიან მდიდარია ანტიოქსიდანტებითა და სასარგებლო ნივთიერებებით. როდესაც ვარჯიშს დაასრულებთ, გირჩევთ, მცირე რაოდენობით ალუბალი დაუყოვნებლივ მიირთვათ. ალუბალი თქვენს კუნთებს სწრაფ აღდგენაში დაეხმარება და ანთებითი პროცესების განვითარებისგანაც დაგიცავთ. ალუბლის შემადგენლობაში შემავალი წითელი პიგმენტი ანტოციანი, რომელიც მას მუქ შეფერილობას აძლევს და მცენარეული სტეროიდები, რომლებსაც ეს საოცარი ხილი შეიცავს, თქვენ ჯანსაღი ფორმისა და კარგი განწყობის შენარჩუნებაში დაგეხმარებათ.
- გრეიფრუტი
არ აქვს მნიშვნელობა რომელი სახის გრეიფრუტს ანიჭებთ უპირატესობას, წითელს თუ ვარდისფერს, მისი მირთმევის შემდეგ თქვენი ფიზიკური შეგრძნებები და განწყობა ნებისმიერ შემთხვევაში საგრძნობლად გაუმჯობესდება. ერთ-ერთმა უახლესმა კვლევამ აჩვენა, რომ ადამიანები, რომლებიც საუზმეზე გრეიფრუტს ხშირად მიირთმევდნენ, გაცილებით ჯანსაღ ფიზიკურ ფორმაში იყვნენ, ვიდრე ის ადამიანები, რომლებსაც აღნიშნული ხილი საერთოდ არ უყვართ. აღსანიშნავია ისიც, რომ გრეიფრუტის მიღება ორგანიზმისთვის არამხოლოდ სუფთა სახით არის სასარგებლო, სხეულის ფორმების გაუმჯობესებასა და ზედმეტი ცხიმებისგან გათავისუფლებაში საუზმეზე გრეიფრუტის წვენის მიღებაც დაგეხმარებათ.
- საზამთრო
ყველასთვის ცნობილია, რომ საზამთრო ერთ-ერთი ყველაზე გემრიელი ხილია, რომელიც ზაფხულის ცხელ დღეებს მნიშვნელოვნად ახალისებს და ადამიანებს გაგრილებაში ეხმარება. გარდა ამისა, ის დიდი რაოდენობით შეიცავს ამინომჟავა ციტრულინს, რომელიც ფიტნეს მოყვარულების ცხოვრებაში უდიდეს როლს ასრულებს. აღნიშნული ამინომჟავა ძალიან სასარგებლოა სისხლის მიმოქცევის გასაუმჯობესებლად. გარდა ამისა, ის კუნთოვანი მასის მატებას უწყობს ხელს და ჯანსაღი ფიზიკური ფორმის შენარჩუნებაში გეხმარებათ.
- ვაშლი
ვაშლი ერთ-ერთი ყველაზე სასარგებლო ხილია. არსებობს მოსაზრება, რომ დღის განმავლობაში ერთი ვაშლის მირთმევა ექიმთან ვიზიტის საჭიროებისგან გაგათავისუფლებთ. ნებისმიერმა გამოცდილმა ბოდიბილდერმა იცის, რომ ვაშლის მირთმევა ათლეტს ჯანსაღი ფიზიკური ფორმისა და კუნთოვანი მასის შენარჩუნებაში ძალიან ეხმარება. მის შემადგენლობაში შემავალი მიკრონუტრიენტი პოლიფენოლი გულ-სისხლძარღვთა სისტემის გამართულ მუშაობას უწყობს ხელს და უჯრედის ფუნქციას აუმჯობესებს. საუკეთესო შედეგების მისაღებად, გირჩევთ ვარჯიშის დაწყებამდე ერთი ცალი ვაშლი მიირთვათ.
- ანანასი
ანანასი საუკეთესო ხილია დღის ჯანსაღად დასაწყებად. ერთი თეფში თხელ ნაჭრებად დაჭრილი ანანასი არაჩვეულებრივი საუზმეა ნებისმიერი ათლეტისთვის. ის ბრომელიადების ოჯახის წევრია. ბრომელიადების ოჯახი ისეთ მცენარეებს აერთიანებს, რომლებიც ანტიოქსიდანტებით ძალიან მდიდარია, ძლიერი ანთების საწინააღმდეგო მოქმედებით გამოირჩევა და დიდი რაოდენობით ვიტამინებსაც შეიცავს. კუნთების სწრაფი აღდგენისთვის, გირჩევთ, ანანასი ვარჯიშის დასრულების შემდეგ მიირთვათ. კუნთოვანი მასის მატების გარდა, ანანასი ჯანმრთელობის ზოგადი მდგომარეობის გაუმჯობესებაშიც დაგეხმარებათ.
- კანტალუპი
კანტალუპი ნესვის ერთ-ერთი ჯიშია. ნესვი ზაფხულის კიდევ ერთი საოცარი ხილია. ცხელ დღეებში მისი შეძენა არ გაგიჭირდებათ. მასში შემავალი ნახშირწყლები ორგანიზმში მარტივად გადამუშავდება. კანტალუპი ძალიან ტკბილი და წვნიანი ხილია. ის კუნთოვანი მასის მატებისთვის ერთ-ერთი საუკეთესო არჩევანია. შეგიძლიათ კანტალუპი უზმოზე, გაღვიძებისთანავე მიირთვათ. ნესვის მიღება ძალიან სასარგებლოა ვარჯიშის დასრულების შემდეგაც.
- ბანანი
ბანანი საუკეთესო არჩევანია, როდესაც კუნთოვანი მასის ზრდაზე ხართ ორიენტირებული. უზმოზე ბანანის მირთმევა მასის მატებაში მნიშვნელოვნად შეგიწყობთ ხელს. ბანანი ძალიან მდიდარია კალიუმით, რომელიც კუნთების ფორმირებისა და მათი მასის შენარჩუნებისთვის ერთ-ერთი ყველაზე სასარგებლო ელექტროლიტია. ბანანი ხელს უწყობს ორგანიზმში გლიკოგენის დონის სტაბილურობის შენარჩუნებას და კუნთს დაზიანებისგან იცავს. ბანანი ერთ-ერთი ყველაზე ჯანსაღი „სწრაფი კვების" პროდუქტია. მისი ჩანთით ტარება საკმაოდ მარტივია, როდესაც დარბაზში მიდიხართ, ბანანის წაღება დისკომფორტს ნამდვილად არ შეგიქმნით.
- მარწყვი
მარწყვი ვარჯიშის დაწყებამდე უნდა მიირთვათ. ის ჯანსაღი სმუზის შემადგენლობაში შემავალი ერთ-ერთი ყველაზე პოპულარული ინგრედიენტია. მარწყვის შემადგენლობაში შემავალი ფლავონოიდები თქვენი ჯანმრთელობისთვის ძალიან სასარგებლოა. მარწყვი ჯანსაღი ხემსია, რომელიც, გარდა იმისა, რომ კუნთოვანი მასის მატებაში შეგიწყობთ ხელს, დანაყრების შეგრძნებასაც სწრაფად გაგიჩენთ. კუნთოვანი მასის ზრდაზე როდესაც ზრუნავთ, უპირატესობა ყოველთვის ნატურალურ და ჯანსაღ პროდუქტებს უნდა მიანიჭოთ.
- ჟოლო
ჟოლო, მარწყვის მსგავსად, ხილის სმუზის ერთ-ერთი ყველაზე სასარგებლო და ამავე დროს გემრიელი ინგრედიენტია. ჟოლო ძალიან მდიდარია ფლავონოიდებითა და ანტიოქსიდანტებით. მის შემადგენლობაში დიდი რაოდენობით სასარგებლო მიკრონუტრიენტი გვხვდება, რომლებიც კუნთების სიჯანსაღის შენარჩუნებაში დაგეხმარებათ. თუ გსურთ, რომ ძლიერი და ჯანმრთელი იყოთ, კუნთოვანი მასის მატებისთვის განკუთვნილი პროდუქტების ნუსხაში ჟოლო აუცილებლად უნდა შეიტანოთ.
კვების ექსპერტები თანხმდებიან, რომ ხილის მირთმევისთვის საუკეთესო დრო დილაა, როდესაც თქვენ ჯერ კიდევ არაფერი მიგიღიათ. ხილი გაღვიძებისთანავე, უზმოზე უნდა მიირთვათ. შეგიძლიათ ის დღის განმავლობაში ხემსის სახითაც მიიღოთ. ფრუქტოზა, რომელსაც დილის საათებში იღებთ, ორგანიზმში ცხიმის სახით არ შეინახება, მაგრამ ეს მხოლოდ იმ შემთხვევაში, თუ უზმოზე ხილის გარდა არაფერს მიირთმევთ. სხვა ნებისმიერი საკვების მსგავსად, ხილის მირთმევის დროსაც ზომიერების დაცვას უდიდესი მნიშვნელობა ენიჭება. თქვენი კვებითი საჭირობების დასადგენად, უმჯობესია, თუ კონსულტაციას გამოცდილ და ავტორიტეტულ დიეტოლოგთან გაივლით. ჯანსაღი სხეულის შენარჩუნებაზე ზრუნვა მხოლოდ მძიმე წონებით აზიდვებში არ უნდა გამოიხატებოდეს. ძალიან მნიშვნელოვანია, რომ ჯანსაღი კვების წესები ზედმიწევნით დაიცვათ და თქვენი ორგანიზმის ჯანმრთელობის შენარჩუნებაზე ყოველდღიურად იზრუნოთ.
წარმატებებს გისურვებთ!
