ინტერვალური შიმშილობისას დაშვებული შეცდომები, რომლებიც მიზნის მიღწევაში ხელს გიშლით
ინტერვალური შიმშილი წონაში კლების მსურველებს ოცნებების ახდენის შესაძლებლობას აძლევს. მისი დახმარებით არამხოლოდ ზედმეტი კილოგრამებისგან გათავისუფლება შეგიძლიათ, არამედ კუნთოვანი მასის მატებას ჭარბი ცხიმების დაგროვების გარეშეც შეძლებთ. თუ ინტერვალურ შიმშილს რეგულარულად მიმართავთ, მაგრამ სასურველი შედეგის მიღებას ვერ ახერხებთ, ე.ი. სერიოზულ შეცდომებს უშვებთ, რომელთა გამოც მიზნის მიღწევა არ გამოგდით. ჩვენს სტატიაში ინტერვალური შიმშილობის დროს დაშვებულ ყველაზე გავრცელებულ შეცდომებს გაგაცნობთ, რომლებიც არ უნდა დაუშვათ.
- ინტერვალურ შიმშილზე გადასვლისას კვების რაციონის უცვლელად დატოვება
ადამიანები, რომლებიც წონაში დაკლებას ვერ ახერხებენ, არასწორად იკვებებიან. წარუმატებელი მცდელობების 83,4 % არაჯანსაღ კვების რაციონს უკავშირდება. არ აქვს მნიშვნელობა წონაში დაკლების რომელ მეთოდებს მიმართავთ, არცერთი მათგანი არ იმუშავებს, თუ თქვენი რაციონი არაბალანსირებული და უხარისხო იქნება. ჯანსაღი პროდუქტებით კვება საკმაოდ რთულია, რის გამოც ადამიანების უდიდესი ნაწილი უპირატესობას გადამუშავებულ, მაღალცხიმიან და კალორიულ საკვებს ანიჭებს. გასაკვირი არ არის, რომ ჩიფსების, ტკბილი გაზიანი სასმელებისა და საკონდიტრო ნაწარმის მოყვარულებს საკუთარი სხეულის კომპოზიცია არ აკმაყოფილებთ. თუ თქვენ დილით გემრიელ ბლინებსა და შოკოლადის რძეს მიირთმევთ, სერიოზული სამუშაოს გაწევა მოგიხდებათ. იმისთვის, რომ ინტერვალური შიმშილით სასურველი შედეგის მიღება შეძლოთ, გარკვეული მიზნების დასახვა მოგიწევთ. აუცილებელი არ არის, რომ გადამუშავებული საკვები რაციონიდან სრულად გამორიცხოთ, მაგრამ ყოველდღიურად მხოლოდ ჯანსაღი ხილით, ბოსტნეულით, ხორცით და თევზით კვება გაცილებით უკეთეს შედეგს მოგიტანთ. იგივე მიზანი უნდა გქონდეთ სასმელთან დაკავშირებითაც. თუ თქვენს რაციონში წყლის, უშაქრო ყავის და ჩაის გარდა სხვა სასმელებიც შედის, წონაში დაკლება ძალიან გაგიჭირდებათ. თუ სერიოზული მიზნები გაქვთ დასახული, მათ სერიოზულად უნდა მიუდგეთ. თავს პურის ან სხვა მაღალნახშირწყლოვანი პროდუქტების მირთმევის ნება მხოლოდ მას შემდეგ უნდა მისცეთ, როდესაც გარკვეული შედეგის მიღებას შეძლებთ.
- ფიზიკურ აქტივობაზე უარის თქმა
რა ხდება მაშინ, როდესაც ვიღაც მისი საიდუმლოს შენახვას გთხოვთ? თქვენ სურვილი გიჩნდებათ, რომ ახალი ამბავი, რომელიც გაიგეთ სხვებსაც გააგებინოთ. როდესაც ინტერვალურ შიმშილს იწყებთ და იცით, რომ საკვების მიღებისგან თავი უნდა შეიკავოთ, თქვენ გამუდმებით საჭმელზე ფიქრობთ. ინტერვალური შიმშილობის დაწყებისთანავე, გირჩევთ, ფიზიკურად მაქსიმალურად გააქტიურდეთ. სამსახურში წადით, ისეირნეთ, ირბინეთ, ივარჯიშეთ, მეგობრებთან ერთად გაერთეთ. დრო ისე შეუმჩნევლად გავა, რომ საკვებზე ფიქრისთვის ვეღარ მოიცლით. თუ სახლში დაჯდებით და საკუთარ თავს შიმშილობას მიუსჯით, ცხადია, დაიტანჯებით. ამგვარად რეჟიმის დაცვა ძალიან გაგიჭირდებათ. ეცადეთ, სახლი არაჯანსაღი პროდუქტებისგან გაწმინდოთ. შიმშილობის საათებში კი საკვები თქვენი თვალთახედვიდან უნდა გააქროთ. არ წახვიდეთ მეგობრებთან ერთად ისეთ ადგილებში, სადაც ისინი დალევას ან სადილობას გეგმავენ.
- შიმშილობის დაწყებისას ზედმეტი ამბიციების ქონა
ინტერვალური შიმშილი რამდენიმე ეტაპისგან შედგება. დასაწყისშივე ნუ გადაწყვეტთ, რომ დღეში მხოლოდ ერთხელ კვება თქვენთვის ნორმალურია და მსგავს რეჟიმთან გამკლავება არ გაგიჭირდებათ. როდესაც კვების ახალ რეჟიმზე გადადიხართ, ზედმეტ სირთულეებს ნუ შეეჭიდებით. საკუთარი შესაძლებლობები სწორად უნდა შეაფასოთ. ზედმეტი ამბიციების ქონა ხშირად დამღუპველია და წარმატების მიღწევაში მხოლოდ ხელს გიშლით. დასაწყისისთვის დღის განმავლობაში სულ ცოტა ექვსჯერ მაინც უნდა მიირთვათ. შემდეგ კი ულუფების რაოდენობა ნელ-ნელა შეამციროთ. თავიდანვე მკაცრ რეჟიმზე არ უნდა გადახვიდეთ. ინტერვალური შიმშილის დაწყების შემდეგ, შესაძლოა, ბევრი იმედგაცრუება გამოსცადოთ, ბევრჯერ დანებდეთ. ეს პროცესის განუყოფელი ნაწილია, რაც არ უნდა გთრგუნავდეთ ან გაშინებდეთ. თუ შიმშილის დროს საუზმის გამოტოვება გაქვთ გადაწყვეტილი, მაგრამ ამას ვერ ახერხებთ, გირჩევთ, მაღვიძარა მაქსიმალურად გვიან დააყენოთ. თუ დილით ადრე იღვიძებთ, საუზმე არ მოიმზადოთ. თუ კვირაში ერთ დღეს სრულ შიმშილობას უთმობთ, ეცადეთ ამ დღეს მაცივარი მაქსიმალურად ცარიელი გქონდეთ.
- შიმშილის გრძნობით გამოწვეული შიში
შიმშილი სავსებით ნორმალური შეგრძნებაა, რომელიც თქვენში შიშს არ უნდა იწვევდეს. ნუ ღელავთ, კალორიების დანაკლისის გამო კუნთოვან მასას არ დაკარგავთ. 16-20 საათით შიმშილობა ზიანს არავის აყენებს. ადამიანის ორგანიზმს ექსტრემალურ ვითარებაში გადარჩენის საოცარი უნარი აქვს. არაერთი კვლევით დასტურდება, რომ ინტერვალურ შიმშილს ორგანიზმისთვის უამრავი სარგებელი მოაქვს. ხანმოკლე შიმშილი კუნთებს არ აზიანებს და არც თქვენს ჯანმრთელობას უქმნის საფრთხეს. ცხადია, ხანგრძლივი შიმშილობა და კალორიების პერმანენტული დეფიციტი ორგანიზმისთვის სასარგებლო არ არის. ინტერვალური შიმშილობის მიმდევარი ადამიანები კუნთოვანი მასის ჩამოყალიბებას მარტივად ახერხებენ და საოცრად გამოიყურებიან. ნუ იფიქრებთ, რომ დღის განმავლობაში ერთხელ კვება სახიფათოა. შიმშილს არ შეუშინდეთ და რეჟიმს ბოლომდე უერთგულეთ. ეს მხოლოდ სარგებელს მოგიტანთ.
- შიმშილობის ინტერვალის მეტისმეტად გახანგრძლივება
სასურველი შედეგის მიღება თქვენ გაფიქრებინებთ, რომ ინტერვალური შიმშილი ძალიან კარგია, რის გამოც ცდილობთ უფრო მეტი იშიმშილოთ. ადამიანები შეცდომას უშვებენ, როდესაც შიმშილის ინტერვალებს მეტისმეტად ახანგრძლივებენ. ნუ ჩათვლით, რომ შიმშილობის ინტერვალის გაზრდა შედეგის გაუმჯობესებაში დაგეხმარებათ. ეს ასე არ არის. ორგანიზმი მეტისმეტად არ უნდა აშიმშილოთ. როდესაც შიმშილობის ინტერვალს ოც საათამდე ზრდით, დაფიქრდით, შეუძლია თუ არა თქვენს ორგანიზმს მსგავს დატვირთვასთან გამკლავება. შიმშილობამ თქვენი ჯანმრთელობა უნდა გააუმჯობესოს. თუ გრძნობთ, რომ მეტისმეტი მოგდით და ორგანიზმი გისუსტდებათ, რეჟიმი აუცილებლად უნდა შეცვალოთ.
- ინტერვალის ზედმიწევნით ზუსტად დაცვა
ადამიანები უდიდეს შეცდომას უშვებენ, როდესაც შიმშილობის ინტერვალებს ზედმიწევნით იცავენ. ისინი გამუდმებით საათს უყურებენ და ცდილობენ, რომ დრო მაქსიმალურად აკონტროლონ. ინტერვალური შიმშილობის მიმდევრები ფიქრობენ, რომ ერთ წუთს მათი პროგრესის განადგურება შეუძლია. ისინი თავს თავისუფლად არასდროს გრძნობენ და ყოველთვის დაძაბულები არიან. თუ გადაწყვეტთ, რომ შიმშილობისას დღეში ორჯერ ან ერთხელ მიირთვათ, წამებს და წუთებს ნუ დაითვლით. მოდუნება აუცილებელია, რათა სასურველი შედეგის მიღება გაგიმარტივდეთ. ზედმეტი დაძაბულობა საჭირო არ არის. თუ გრძნობთ, რომ ძალიან გშიათ, შიმშილის ინტერვალი კი ჯერ კიდევ ძალაშია, თავს ნუ დაიტანჯავთ. შეგიძლიათ, ბოსტნეული მიირთვათ, რათა დამშვიდება შეძლოთ. ამის გამო ნუ დაისტრესებით. თუ თავს თავისუფლად არ გრძნობთ, რეჟიმის დაცვა ძალიან გაგიჭირდებათ.
- დეტალებზე ყურადღების ზედმეტად გამახვილება
ადამიანების უდიდესი ნაწილი ერთსა და იმავე შეცდომას უშვებს. ისინი პროცესს მთლიანობაში ვერ აღიქვამენ, რის გამოც კონკრეტულ დეტალებზე მეტისმეტად არიან ორიენტირებულნი. როდესაც ასე იქცევით, შესაძლოა, თითოეული დეტალის მნიშვნელობა გესმოდეთ, მაგრამ ვერასდროს მიხვდებით, როგორ უკავშირდებიან ისინი ერთმანეთს და რა სარგებლობა მოაქვთ მთლიანი პროცესისთვის. ადამიანები, რომლებიც ინტერვალურ შიმშილს იწყებენ, ყოველთვის დეტალებზე ამახვილებენ ყურადღებას. მათ აინტერესებთ, დამღუპველია თუ არა ყავაში ერთი კოვზი ნაღების ჩამატება. ისინი ასევე ინტერესდებიან, ინტერვალური შიმშილის რომელი მეთოდია უფრო შედეგიანი 16:8 - ზე თუ 16.1:7.9 -ზე. მსგავს შეცდომებს ნუ დაუშვებთ. ყავაში ნაღების ჩამატება უკანასკნელია, რის გამოც შეიძლება შიმშილობისას იღელვოთ. გირჩევთ ყურადღება უფრო მნიშვნელოვან საკითხებზე გაამახვილოთ. დააკვირდით, როგორია თქვენი კვების რაციონი, რამდენად სწორად გაქვთ შერჩეული პროდუქტები, რომლებსაც ყოველდღიურად მიირთმევთ, უთმობთ თუ არა სათანადო დროს და ენერგიას ვარჯიშს, იღებთ თუ არა კალორიების იმ რაოდენობას, რომლებიც თქვენი მიზნების მიღწევაში დაგეხმარებათ, იღებთ თუ არა საჭირო რაოდენობით ცილას. ინტერვალური შიმშილის დროს ეცადეთ რაციონი მაქსიმალურად გაამრავალფეროვნოთ ბოსტნეულით და ჯანსაღი ცხიმებით.
ინტერვალური შიმშილის ფილოსოფია საკმაოდ მარტივია: დღის გარკვეულ მონაკვეთს შიმშილობაში ატარებთ, დანარჩენ დროს კი დანაყრებას უთმობთ. თქვენი მიზნებიდან გამომდინარე თავად უნდა გადაწყვიტოთ, რამდენ დროს გამოუყოფთ შიმშილობას. შეგიძლიათ ეს დღეგამოშვებით გააკეთოთ, ან კვირაში მხოლოდ ერთი დღე იშიმშილოთ. ზოგიერთი ადამიანი შიმშილს თვეში მხოლოდ ერთ დღეს უთმობს. პროცესი მთლიანობაში აღიქვით და დეტალებს ღრმად ნუ ჩაეძიებით. რაც უფრო რთულად შეხედავთ კონკრეტულ საკითხებს, მით უფრო გაგიჭირდებათ შედეგის მიღება.
წარმატებებს გისურვებთ!
